Nigeria: Abana barenga 300 bari barashimuswe na Boko Haram barekuwe

Ingabo za Nigeria ziri kwivuga ibigwi nyuma y’uko abana 350 bari barashimuswe na Boko Haram barekuwe, zikemeza ko zabigizemo uruhare.

Umuyobozi wa Boko Haram Aboubacar Shekau yari aherutse gucisha video kuri YouTube avuga ko abarwanyi be ari bo bagabye igitero mu kigo cy’amashuri kiri Katsina bakica abari bashinzwe kukirinda bagashimuta abana barenga 300 bari bagicumbitsemo.

Bariya barwanyi bagabye igitero kuri kiriya kigo kitwa Kankara  Science Secondary School bari kuri moto,

Gushimuta abana benshi kuriya byaherukaga muri 2014 ubwo abakobwa barenga 200 bashimutirwaga mu mujyi wa Chibok.

Guverineri w’Intara ya Katsina witwa Aminu Bello Masari avuga ko bariya bahungu bari barashimutiwe mu ishyamba rya Zamfara kandi bitwaye neza birinda kurakaza abarwanyi ba Boko Haram.

Yagize ati: “ Ndashima Imana ko bariya bana bitwaye neza birinda icyarakaza bariya barwanyi kuko bari kubarasamo bamwe.”

Ingabo za Nigeria zivuga ko zagize uruhare mu kubohoza bariya bana.

Amajyaruguru ya Nigeria yibasiwe n’abarwanyi ba Boko Haram bakora ibitero shuma bakica abaturage, bagashimuta abana n’abagore ndetse bagasahura.