Abantu bari bavuye gutaha ubukwe barohomye, abagera ku 103 barapfa. Byabereye muri Leta ya Kwara ituranye ni iya Niger muri Nigeria.
Barohamye mu mugezi wa Niger uca hagati y’izi Leta nk’uko Polisi ya Nigeria ibyemeza.
Nta nkuru ibabaje nk’iyi yaherukaga kuvugwa mu migezi yo muri Nigeria.
Icyakora iyo hari impaunuka nk’iyi ibaye, ihitana benshi kubera ko ubwato bwo muri kiriya gihugu bukunda gupakira ibintu byinshi bugatwara n’abantu benshi kandi bushaje.
Birushaho kuba bibi mu gihe cy’imvura nyinshi, amazi akarenga inkombe z’imigezi agateza imyuzure.
Umuvugizi w’Ishami rya Polisi yo mu Ntara ya Kwara witwa Okasanmi Ajayi yabwiye AFP ko imibare y’abaguye muri iriya mpanuka ishobora kuza kwiyongera kubera ko hari imibiri itaraboneka.
Ibikorwa byo gushakisha indi mibiri ngo barebe niba hari ababa bagihumeka irakomeje.
Polisi ivuga ko abapfuye biganjemo abo mu bice bya Ebu, Dzakan, Kpada, Kuchalu na Sampi, bose bakaba abo mu gace ka Patigi ko muri iriya Ntara.
Guverineri w’iriya Ntara yihanganishije ababuze ababo.
Muri Gicurasi, 2023 ubundi bwato bwararohamye abana 15 bahasiga ubuzima, abandi 25 baburirwa irengero.
Byabereye muri Leta ya Sokoto iri mu Burengerazuba bw’Amajyaruguru bwa Nigeria.
Mu gihe [gishize] kingana n’umwaka, hari ubundi bwato bwarohamye abana 29 bahasiga ubuzima.
Abo bana bavuye gutashya inkwi batega ubwato bari basanze ku mwaro, ariko ntibagera imuhira amahoro.
Mu Ukuboza, 2022 indi mpanuka y’ubwato ikomeye yahitanye abantu 76 barohamiye ahitwa Anambra mu Majyepfo ashyira Uburasirazuba bwa Nigeria.
Uruzi rwa Niger nirwo runini mu Burengerazuba bw’Afurika kandi rukaba ihuriro ry’ibihugu byinshi byo muri iki gice cy’Afurika.
Rukora ku bihugu birimo Niger, Nigeria, Mali, Benin na Guinea.
