Minisitiri w’Ububanyi n’Amahanga w’u Bufaransa, Jean-Noël Barrot, yavuze ko ubufasha bwa gisirikare igihugu cye giha Arabie Saoudite mu guhangana n’ibitero by’Abahouthi bo muri Yemen, bashyigikiwe na Iran, bugamije gusa kwirwanaho.
Ibi yabivugiye kuri televiziyo ya Leta y’u Bufaransa, France 2, ku Cyumweru, nyuma y’uko Perezida Emmanuel Macron ku wa Kane atangaje ko u Bufaransa bugiye kohereza muri Arabie Saoudite abasirikare, ibikoresho bya radar n’ubundi buryo bwo kwirwanaho.
Arabie Saoudite imaze iminsi iraswaho misile n’indege zitagira abapilote (drones) by’Abahouthi.
Ibi bitero byiyongereye nyuma y’uko imirwano muri Yemen yongeye kubura muri Nyakanga, ihagarika agahenge kari kamaze imyaka myinshi.
Ibi byatumye Yemen iba ahandi hagukiye intambara ikomeje mu Burasirazuba bwo Hagati.
Ibitero byibasiye ibikorwa remezo bya peteroli bya Arabie Saoudite, birimo n’icyambu cya Yanbu, cy’ingenzi mu kohereza peteroli mu mahanga.
Arabie Saoudite na yo ishyigikiye mu bya gisirikare ingabo za Leta ya Yemen zirwanya Abahouthi.
Abahouthi barashaka guhagarika ibicuruzwa by’ingufu bya Arabie Saoudite byoherezwa mu mahanga. Ibyo bicuruzwa byimuriwe ku Nyanja Itukura nyuma y’uko ibitero bya Iran mu Nzira ya Hormuz bibangamiye ubwikorezi bw’ibicuruzwa mu Kigobe cy’Abarabu.
Barrot yabajijwe niba ubufasha u Bufaransa buha Arabie Saoudite busobanuye ko Paris yabaye umufatanyabikorwa wayo mu ntambara irwana n’Abahouthi, asubiza ati: “Oya rwose. Ubu bufasha bugamije gusa kwirwanaho.”
Yongeyeho ko kuva intambara ya Leta Zunze Ubumwe za Amerika na Israel na Iran yatangira, u Bufaransa bwashyize mu bikorwa ibikoresho n’ubushobozi bwa gisirikare bigamije kurinda ibihugu bifatanya na bwo n’ibindi bufatanyije na byo.
Ati: “Ese ibyo bivuze ko igihe icyo ari cyo cyose dushobora gufatwa nk’abari mu ntambara ku ruhande rumwe n’abandi? Oya, nta na rimwe.”
Barrot yavuze ko ingano y’ingabo n’ibikoresho bya gisirikare u Bufaransa buzakohereza muri Arabie Saoudite izaterwa n’ibyo icyo gihugu kizaba gisabye, ubushobozi u Bufaransa bufite, ndetse n’uko ibintu bizagenda bihinduka.
Ingabo zo muri Djibouti zafasha
Ubufaransa bufite ingabo zihoraho muri Djibouti, zizwi nka Forces françaises stationnées à Djibouti (FFDj).
Mu makuru aheruka gutangazwa n’Igisirikare cy’u Bufaransa, havugwa ko hari abasirikare b’Abafaransa hafi 1,500 bari muri Djibouti.
Bafite ibirindiro birimo Base aérienne 188, ibirindiro by’ingabo zirwanira ku butaka, ubwato bw’intambara n’ikigo cy’imyitozo kiri mu butayu.
Hari n’indege z’intambara bita Mirage 2000-5 na Mirage 2000D, kajugujugu n’izindi ndege, ndetse n’ubwato bwa gisirikare.
Mu mwaka wa 2026, izi ndege zakomeje gukora ibikorwa byo kurinda no kugenzura ikirere cya Djibouti.
Ubufaransa na Djibouti bifitanye amasezerano y’ubufatanye mu by’ingabo, yavuguruwe ku wa 24 Nyakanga 2024 mu gihe cy’imyaka 20.
Ibirindiro by’u Bufaransa muri Djibouti bishobora no kuba ahantu h’ingenzi mu gutanga ubufasha bw’ibikoresho ku ngabo z’u Bufaransa zikora ibikorwa mu Burasirazuba bwo Hagati harimo no muri Arabie Saoudite .
Mu Nyakanga 2026, indege A400M zakoraga ingendo hagati ya Djibouti na Abu Dhabi muri Leta ziyunze z’Abarabu zitwaye ibikoresho.
Bityo, Djibouti ni kimwe mu birindiro by’ingenzi cyane by’u Bufaransa muri Afurika, cyane cyane kubera aho iherereye hafi y’Inyanja Itukura, umuhora wa Bab-el-Mandeb n’inzira ijya mu Burasirazuba bwo Hagati.
