Muri Amerika haravugwa inkuru y’umugabo waraye asanze abantu benshi hamawe abarasira mu kivungue yicamo abantu 22 akomeretsa abandi bagera kuri 60.
Polisi yo muri Leta ya Maine ari n’aho byabereye ivuga ko amakuru y’ibanze bafite kuwo bakeka ko ari we wakoze biriya ari uko yahoze ari umusirikare mu ngabo z’Amerika ndetse watozaga abandi ibyo kurasa.
Ukekwa yitwa Robert Card akaba afite imyaka 40 y’amavuko.
Akomoka ahitwa Bowdoin muri Leta ya Maine, ni Umuzungu.
Card yasanze abantu bari gufata amafunguro abarasa akoresheje imbunda isanzwe ari iy’abasirikare ba Amerika yitwa AR-15.
Umwe mu bapolisi bakuru bo muri Leta ya Maine yaburiye abantu kwirinda kwegera Robert Card kuko ari mubi, kandi afite ubugome bwinshi.
Yabagiriye inama yo kumuhungira kure.
Polisi iri kumuhigisha uruhindu kuko abapolisi bari gusaka inzu ku yindi ari nako kajugujugu zabo ziri mu kirere zicunga ko hari aho zabona Card.
Ibitaro byo muri Maine byitabajwe ngo bivure abakomeretse babarirwa hagati aya 50 na 60 kandi n’imirambo y’abapfuye iruhukiye muri ibyo bitaro.
Ubwicanyi bukorewe mu kivunge bukozwe n’abitwaje intwaro bumaze kuba ikibazo gisa n’icyamenyerewe muri Leta zunze ubumwe z’Amerika.
Abanyamerika bicana barasanye kurusha uko biba ahandi aho ari ho hose ku isi.
Mu mwaka wa 2021 hari umusore w’imyaka 18 wishe abantu 21. Byabereye muri Leta ya Texas.
Si we gusa ahubwo kuko taliki 05, Kamena, 2022 muri Leta Philadelphia, USA, umuntu yarasiye abandi mu ruhame, babiri bahasiga ubuzima bandi 20 barakomereka cyane.
Polisi yo muri Philadelphia yatangaje ko byabereye aho imihanda ibiri yitwa Third and South Streets ihurira.
Barindwi mu bakomeretse bajyanywe mu bitaro byitiriwe uwabaye Perezida wa gatatu w’Amerika witwa Thomas Jefferson.
Leta z’Amerika zikunze kugaragarwamo ubwicanyi ni Alabama, Louisiana, Michigan, Tennessee, Arkansas, Ohio, Wisconsin, Georgia, Illinois na Maryland.
