Urwego rw’ubuzima muri Uganda rwatangaje ko abantu barindwi bamaze gusuzumwa basanganwa ubwandu bwa Ebola. Kugeza ubu umwe niwe imaze guhitana.
Mu gihe hari barindwi byemejwe ko bayanduye, hari abandi bangana nabo baherutse gupfa bigakekwa ko ari yo yaba yarabahitanye.
Iperereza riracyabikorwa ho.
Hagati aho ibihugu bituranye na Uganda harimo n’u Rwanda byasabye ababituye kwirinda icyatuma bayandura.
Ebola ivugwa muri Uganda abahanga bayise inya-Sudani.
Mu Cyongereza bayita Sudan strain.
Umuntu uherutse kuzira iyi ndwara yari umugabo w’imyaka 24 wagaragazaga ibimenyetso byo kuruka no guhitwa kandi akumva ababara mu rukenyerero.
Ikindi kandi ngo yarukaga amaraso.
Umukozi muri Minisiteri y’ubuzima muri Uganda witwa Kyobe Henry Bbosa yemereye Reuters ko bamaze kubarura abantu barindwi banduye iriya ndwara iri mu zica kandi zandura vuba.
Hashize iminsi mike Minisiteri y’ubuzima muri Uganda itangarije kuri Twitter ko Ebola yabonetse mu baturage b’iki gihugu.
Iyi ndwara yaherukaga guhitana umuntu mu mwaka wa 2019.
Muri Mata, 2022, Ishami ry’Umuryango w’Abibumbye rishinzwe ubuzima, World Health Organization( WHO), ryatangaje ko icyorezo Ebola kiri muri Repubulika ya Demukarasi ya Congo cyari cyamaze kugira imbaraga zituma kigera no muri Repubulika ya Congo bituranye.
Ibi bihugu biraturanye k’uburyo imirwa mikuru y’ibi bihugu igabanywa n’ikiraro cy’uruzi rwa Congo.
Ibi byatangajwe hashize igihe gito, Repubulika ya Demukarasi ya Congo itangaje ko muri kiriya gihugu hadutse ‘ubwandu bwa 14’ bw’iki cyorezo.
Bwari bwiganje mu Ntara ya Equatéur mu gace kitwa Mbandaka.
Ubwoba bwari ubw’uko kiriya cyorezo gishobora no kuzagera mu Murwa mukuru, Kinshasa.
