Menu
Indimi
Advert

Ubuzima

Uko Uturere Tw’u Rwanda Turutanwa Mu Kwibasirwa Na COVID-19

Yanditswe

kuwa

Kugeza kuri iki Cyumweru, imibare ya Minisiteri y’Ubuzima igaragaza ko abamaze kwandura icyorezo cya COVID-19 mu Rwanda ari abantu 18.053, abamaze gupfa ni 249.

Iki cyorezo cyagaragaye bwa mbere mu Bushinwa mu mpera z’umwaka wa 2019, ariko magingo aya kimaze kugera ku isi hasi ya hose kuko abasaga miliyoni 112 bamaze kucyandura, naho miliyoni 2.4 cyarabahitanye.

Mu Rwanda, umurwayi wa mbere yabonetse ku wa 14 Werurwe 2020. Kugeza ubu cyageze hirya no hino mu Rwanda.

Mu banduye bose hamwe, abantu 16.567 (91.7%) banduriye imbere mu gihugu, mu gihe 1.070 bavanye uburwayi mu mahanga.

Nta wabura no kuvuga ko umubare w’abafite ubwandu utazwi, kuko abamaze gupimwa bataragera no kuri miliyoni imwe, mu banyarwanda bagera muri miliyoni 13.

Bigaragara ko COVID-19 iri kugabanuka mu Rwanda

Kigali iri imbere

Minisiteri y’Ubuzima igaragaza ko mu turere twose uko ari 30 mu gihugu, nta na kamwe katarasangwamo abanduye COVID-19.

Gusa Umujyi wa Kigali uri imbere mu kwibasirwa, urebye ku mubare w’abamaze gusangwamo COVID-19 cyangwa abo yahitanye.

Mu bamaze kwandura, Kigali yagaragawemo abantu 9047 (50.1%) barimo 3 832 bamaze kugaragara mu Karere ka Nyarugenge, 2609 bapimwe muri Kicukiro bagasangwamo ubwandu na 2606 basanzwe muri Gasabo.

Hanze y’umurwa mukuru, uturere tumaze kugaragaramo abarwayi benshi kurusha utundi ni Rusizi (957), Kirehe (802), Rubavu (768), Huye (583), Musanze (551), Nyamagabe (483), Gicumbi (460), Ngoma (440), Gatsibo (405), Muhanga (376), Karongi (346), Nyagatare (339), Kayonza (275) na Rwamagana (265).

Hari kandi Ruhango (249), Gisagara (248), Nyamasheke (229), Kamonyi (201), Rulindo (199), Gakenke (185), Bugesera (161), Nyanza (136), Nyaruguru (99), Ngororero (87), Burera (72), Nyabihu (65), Rutsiro (25).

Urebye umubare w’abamaze gupfa bazize COVID-19 uko ari 249, usanga Kigali iri imbere kuko ifitemo abantu 192 (77.1%). Barimo 66 bo mu Karere ka Gasabo, 64 bo muri Nyarugenge na 62 bo muri Kicukiro.

Utu turere – mu gupfusha abantu benshi – dukurikirwa na Huye na Rwamagana buri kamwe kapfushije 10, muri Nyagatare hapfuye 4, mu gihe i Muhanga, Nyamasheke na Gicumbi, muri buri Karere kapfushije abaturage batatu.

Utwo dukurikirwa n’uturere 10 tumaze gupfusha abantu 2 muri buri kamwe, ni ukuvuga Musanze, Kamonyi, Karongi, Kayonza, Kirehe, Bugesera, Bugesera, Nyamagabe, Rubavu, Rulindo na Rusizi.

Uturere tune tumaze gupfusha umuntu umwe umwe ni Ruhango, Ngororero, Nyaruguru na Gatsibo.

Abakiri bato bandura cyane

Mu mibare y’abamaze gusangwamo COVID-19, usanga igice kinini kigizwe n’abakiri bato. Mu banduye bose uko ari 18053, abantu 12412 (68.7%) bafite munsi y’imyaka 39.

Abanduye batarengeje imyaka 20 ni 2648 (14.6%), mu gihe nk’abarengeje imyaka 80 basanzwemo COVID-19 ari 184 (1.01%).

Mu bamaze kwandura bose hamwe, ab’igitsina gabo ni 11078 (61.36%) mu gihe ab’igitsina gore ari 6975, bangana na 38.64%. Binahura n’uko abagabo ari bo benshi bamaze gupfa (168: 67.48%), mu gihe abagore ari 81 (32.53%).

Usanga abapfa biganje mu myaka yo hejuru, kuko nk’abapfuye bafite munsi y’imyaka 40 ari 25 (10%), mu gihe 148 (59.4%) bishwe na COVID-19 barengeje imyaka 60.

Abapfuye bazize COVID-19

Nyuma y’igihe abandura bazamuka cyane cyane mu Mujyi wa Kigali kugeza ubwo hashyizweho gahunda ya Guma mu Rugo yamaze ibyumweru bitatu, abarwaye bakomeje kugabanyuka.

Abagera ku 16.803 (93%) bamaze gukira, naho 1.001 baracyarwaye. Umubare munini usigaye urwarira ndetse ugakirira mu ngo.

Advertisement
Kanda utange igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement

INKURU ZIKUNZWE

Baza cg Dusangize inkuru