Ikigo cy’igihugu cy’ubumenyi bw’ikirere, Meteo- Rwanda, kiraburira Abanyarwanda ko hagati y’itariki ya 01 n’itariki 08, Werurwe, 2026 mu Rwanda hazagwa imvura irenze gato isanzwe igwa mu gihe nk’iki.
Mu gice cya mbere cy’ukwezi kwa Werurwe 2026, Meteo ivuga ko mu Rwanda hateganyijwe imvura iri hagati ya milimetero 30 na 120, ikaba iri hejuru gato y’ikigero cy’impuzandengo yisanzwe igwa muri iki gice.
Impuzandengo y’imvura isanzwe igwa iri hagati ya milimetero 20 na 90.
Ibi biba bivuze litiro ziri hagati ya 20 na 90 z’amazi ‘zisutswe ku buso’ bwa metero kare imwe, bikumvikanisha ubwinshi bw’ayo mazi.
Meteo-Rwanda yungamo ko iminsi izagwamo imvura nyinshi izaba iri hagati y’iminsi ine (4) n’itandatu (6) bitewe n’imiterere ya buri hantu, imvura iteganyijwe ikazibanda cyane cyane hagati y’italiki ya mbere na taliki umunani.
Imvura iteganyijwe izaturuka ku isangano ry’imiyaga iva mu gice cy’amajyepfo y’Isi rizamuka rigana mu karere u Rwanda ruherereyemo.
Ubushyuhe bwo hejuru buteganyijwe muri icyo gihe buri hagati ya dogere Selisiyusi 20 na 30, naho ubushyuhe bwo hasi buteganyijwe buri hagati ya dogere Selisiyusi 9 na 18.
Hagati aho umuyaga uzaba uringaniye ariko ushyira kuba mwinshi ufite umuvuduko uri hagati ya metero 4 na 12 ku isegonda, ukazahuha mu bice bitandukanye by’igihugu.
