Umukino wahuje amakipe akomeye muri Guinea Conakry warangiye nabi nyuma y’uko abafana batemeranyije n’umwanzuro w’umusifuzi bakarwana muri bo hagapfa abantu 56.

Ibi byago byabereye mu Mujyi wa N’Zerekore, wa kabiri mu bunini muri Guinea Conakry.

Icyemezo cy’umusifuzi cyateje rwaserera cyari icya penaliti yatumye abo ku ruhande rw’ikipe yari ikoze ikosa ryavuyemo iyo penaliti batishima, batera amabuye mu kibuga abo ku rundi bararakara biteza imirwano ikomeye.

Al Jazeera yatangaje ko Minisitiri ushinzwe itangazamakuru muri kiriya gihugu witwa Fana Soumah, yasohoye itangazo rivuga ko hatangijwe iperereza kuri iki kibazo.

Imibare igenekereje ivuga ko abantu 20,000 ari bo bari bari ku kibuga cyabereyeho ako kaduruvayo.

Indi ngingo ivugwa ni iy’uko umubare w’abaguye muri ubwo bushyamirane ishobora kwiyongera kuko hari abavunitse ingingo zikomeye nk’imbavu, amagufa y’urutirigongo n’ahandi.

Kuri X, Minisitiri w’Intebe wa Guinea Conakry, Amadou Oury Bah yatangaje ko abayobozi bari gukora ibishoboka byose ngo bagarure umutekano aho ibyo byabereye.

Ibinyamakuru byo mu Mujyi wa N’Zerekore byatangaje ko inzego zishinzwe umutekano zagerageje gukoresha ibyuka biryana mu maso ngo zitatanye abari bashyamiranye no guhosha umuvundo ariko baraziganza.

Imiryango iharanira uburenganzira bwa muntu itangaza ko abenshi mu bapfuye ari abana.