Raporo yasohowe n’ikigo gishinzwe amabuye y’agaciro, mine na petelori igaragaza ko mu mabuye y’agaciro yacukuwe mu gihembwe cya gatatu cy’uyu mwaka, Zahabu ari ryo buye ryinjirije u Rwanda kurusha andi.
Zahabu yacukuwe ingana n’ibilo 1,506 bifite agaciro ka $ 97,553,111, aho hari muri Mata. Muri Gicurasi hacukuwe ibilo 1,520 bifite agaciro ka $ 99,039,329 mu gihe muri Kamena, hacukuwe ibilo 1,670 afite agaciro ka $ 106,100,444.
Ku byerekeye gasegereti muri Mata, 2023, hacukuwe ibilo 388,818 bifite agaciro ka $ 6,210,054.
Muri Gicurasi hacukuwe ibilo 341,533 bifite agaciro ka $ 5,202,418 n’aho muri Kamena hacukurwa ibilo 413,804 afite agaciro ka $7,400,529.
Ibuye rya Coltan niryo ryabaye irya kabiri.
Muri Mata hacukuwe ibilo 133,828 bifite agaciro ka $ 6,296,903, muri Gicurasi, hacukuwe ibilo 198,787 bifite agaciro ka $ 9,587,723 n’aho muri Kamena hacukurwa ibilo 254,400 bifite agaciro ka 11,930, 212.
Ibuye ry’agaciro riza ku mwanya wa gatatu mu yinjirije u Rwanda amafaranga menshi ni wolfram.
Muri Mata hacukuwe ibilo 120,920 bifite agaciro ka $1,574,123, ukwezi kwakurikiyeho kwa Gicurasi hacukurwa ibilo 246,920 bifite agaciro ka $ 3,335,391 mu gihe muri Kamena hacukuwe ibilo 267,595 afite agaciro ka $ 3,579,145.
Muri rusange amabuye yose yacukuwe mu Rwanda akoherezwa hanze angana n’ibilo 6,638,538 akaba afite agaciro ka $ 362,368,845.
Umwaka wa 2022 byari bimeze gute?
Muri Gashyantare, 2022 hari raporo Banki nkuru y’igihugu (BNR) na muri Minisiteri y’Imari n’Igenamigambi basohoye raporo igaragaza ko mu mwaka wa 2022, amabuye y’agaciro u Rwanda rwohereje mu mahanga yarwinjirije miliyoni $683.
Ni hafi miliyari Frw 740 ni ukuvuga ko yazamutseho inyongera ya 52.3 %, ugereranyije na miliyoni $ 448 (hafi miliyari Frw 486 ) rwinjije mu mwaka wabanje(2021).
Zabahu ubwayo yinjirije u Rwanda agera kuri miliyoni $ 488, ni ukuvuga 71.5% y’amadovize yose u Rwanda rwinjije aturutse mu mabuye y’agaciro.
Uru rwunguko rwabonetse guhera mu Mutarama kugeza mu Ugushyingo 2022.
Ni inyongera ya 55.5 % ugereranyije na miliyoni $ 314 rwari rwinjije guhera muri Mutarama-Ugushyingo 2021.
Ku bijyanye n’ingano ya zahabu u Rwanda rwohereje mu mahanga muri kiriya gihe, nayo yariyongereye kuko yavuye kuri toni esheshatu(6) mu mwaka wa 2021 igera kuri toni umunani (8) mu mwaka wa 2022.
Ubwo yagezaga kuri Komisiyo ishinzwe gukurikirana iby’imari n’umutungo bya Leta mu Nteko Ishinga Amategeko, Minisitiri w’imari n’igenamigambi Dr.Uzziel Ndagijimana yagarutse kuri iri terambere.
Icyo gihe yasesenguraga ibijyanye n’ingengo y’imari y’umwaka wa 2022/2023.
Minisiteri y’imari n’igenamigambi yasobanuye ko uko kwiyongera mu gaciro kwa zahabu y’u Rwanda kwaturutse ko muri gahunda yo kuyohereza yabanje kongererwa agaciro, hakiyongeraho ibiciro bya zahabu ku isoko mpuzamahanga byarazamutseho 2.8 %.
Andi mabuye y’agaciro arimo Gasegereti, Wolfram na Coltan, yinjirije u Rwanda miliyoni $186.3 kuko rwohereje mu mahanga amabuye y’ubu bwoko apima Toni 7.844.
Hari hagati ya Mutarama na Ugushyingo, 2022.
Bivuze ko yiyongereyeho 42.2%, ugereranyije na miliyoni $ 131 u Rwanda rwinjije guhera muri Mutarama-Ugushyingo, 2021.
Icyo gihe rwari rwagurishije mu mahanga Toni 6.235.
Andi mabuye y’agaciro atararondowe amazina, yinjirije u Rwanda muri kiriya gihe agera kuri miliyoni $7.9 guhera muri Mutarama-Ugushyingo 2022, mu gihe yari yinjiye agera kuri miliyoni $3 muri 2021 mu mezi nk’ayo n’ubundi.
Minisitiri Ndagijimana yavuze ko muri rusange ayo u Rwanda rwinjije yaturutse muyo rwohereje mu mahanga guhera muri Mutarama-Ugushyingo 2022, yazamutseho 39.4% ugereranyije n’ayo rwinjije muri ayo mezi 2021.
Avuga ko kwiyongera kw’amadovize u Rwanda ruvana mu byo rwohereza hanze byaturutse ku kuba byariyongereyeho 19.1% ndetse no ku kuzamuka kw’ibiciro ku isoko mpuzamahanga.
