Mu irushanwa ry’iteramakofe rya ‘Kigali Fight Night’ ryabaga ku nshuro ya kabiri, ribera muri Kigali aho abarwanye bose mu cy’icyiciro cy’ababigize umwuga, Abanyarwanda batahanye intsinzi.
Iryo rushanwa ryabereye aho wakwita ku gikari cya Kigali Convention Center, mu masaha y’umugoroba kuri uyu wa Gatandatu tariki 28, Werurwe, 2026.
Ryateguwe na Silverback Sports k’ubufatanye n’Ishyirahamwe ry’Umukino w’Iteramakofe mu Rwanda (RBF), ryahuza abakinnyi bo mu bihugu bya Afurika birimo u Rwanda, Uganda, Cameroun, Gabon, Tanzania, Nigeria, Repubulika Iharanira Demokarasi ya Congo, Algeria na Malawi.
Uretse ibipfunsi, abari mu ihema ryari mu masangano y’imihanda ya Kigali Convention Centre baryohewe n’abahanzi Riderman na Bull Dog bataramye n’umuziki wacurangwaga n’aba DJs.
Mu iteramakofe, abakinnye bari mu byiciro binyuranye birimo abana, abakinaga batarabigize umwuga n’abiyemeje kubikora kinyamwuga bikabatunga byonyine.
Mu babigize umwuga, Abanyarwanda bagize ijoro ryiza aho Hagenimana Aimable na Frank Kazungu batsinze imikino.
Hagenimana Aimable yatsinze umurwano wamuhuje na Muhindo Vianney Bahati ukomoka muri Repubulika ya Demukarasi ya Congo.
Undi munyarwanda Frank Kazungu wari ufite abafana benshi yatsinze bimworoheye Umunya Uganda witwa Rogers Kamulegeya.
Indi mikino ni iyahuje Mugunge Augustin Wisomba wo muri Repubulika Iharanira Demokarasiya Congo watsinze Shetebo Bienfait bakomoka mu gihugu kimwe.
Mu bagore, Daniela Muleketsi Nsii wo muri Repubulika Iharanira Demokarasi ya Congo yatsinze Martha Akinyi wo muri Uganda.
Umunya-Gabon Kassa Kingbo Odilon Hans yatsinze Umunya Uganda Saidi Chako.
Umunya-Nigeria Nene Joy Ojo atsinda Umunya-Tanzania Zawadi Kutaka.
Umukino wari ukomeye cyane ni uwaranzwe no guhatana no kwihangana wabaye hagati ya Umunya-Algeria Abderrezzak Lamrani yatsinze bigoranye Umunya-Malawi Simion Tchetha.
Jerry Katamba ukomoka muri Repubulika Iharanira Demokarasi ya Congo yatsinze Ali Mkojani ukomoka muri Tanzania.
Umurwano wari utegerejwe na benshi wahuje Tamba Merlin ukomoka muri Cameroon na Kivu Karume ukomoka muri Tanzania, warangiye uyu Munya-Cameroon umaze kubaka izina atsinze Kivu Karume.
Mu batarabigize umwuga, Cyusa Albert yatsinzwe na Nsabimana Anelika. Romeo Mungungu atsinda Grady.
Bibwireyezu Betishabah yatsinzwe na Uwineza Deborah.
Ngabonziza Fenias atsinda Kevin Habineza, naho Lumumba Kabisa Maheshi atsinda Sibomana Olivier, Mugenga Innocent atsinda Hakime Nizeyimana, naho Mbazira Elifaz atsinda Niyonzima Pacific.
