Umuyobozi Mukuru wa Atlético de Madrid, Miguel Ángel Gil Marín, ari mu bantu bazita amazina abana b’ingagi mu muhango wa Kwita Izina ku nshuro ya 21, ubera i Kinigi mu Karere ka Musanze kuri uyu wa Gatanu italiki 05, Nzeri(9), 2026.
Gil Marín, asanzwe ari umwe mu bayobozi bakomeye muri ruhago y’u Burayi, akazifatanya na bagenzi be bazita amazina y’abana 22 b’ingagi.
Kwita Izina 2026 rizaba ku wa 4 Nzeri 2026, ku birenge by’Ibirunga muri Kinigi, ku nsanganyamatsiko y’insanganyamatsiko y’uko ‘kubungabunga ibidukikije ari ubuzima no kubaka ejo ahazaza harambye.’
Uyu mwaka uyu muhango uzaba uhaye ku nshuro ya 20 uhuza u Rwanda n’abafite uruhare mu kubungabunga ibidukikije, siporo, ubucuruzi, imyidagaduro n’umuco.
Kuva Kwita Izina byatangizwa ku mugaragaro mu 2005, hamaze kwitwa amazina ingagi 438.
Muri iki gihe, mu gice cy’Ibirunga gihuriweho n’u Rwanda, Uganda na Repubulika Iharanira Demokarasi ya Congo, habarirwa ingagi zo mu misozi zirenga zirenga 1000.
Kwita Izina bigamije kugaragaza uruhare rw’abaturage mu kubungabunga pariki, guteza imbere ubukerarugendo burambye no guha agaciro ubuzima bw’inyamaswa n’ibidukikije.
Kuva mu mwaka wa 2005, uyu muhango wabaye kimwe mu bikorwa mpuzamahanga bizwi cyane mu guteza imbere ubutumwa bwo kubungabunga ingagi n’ibinyabuzima.
Miguel Ángel Gil Marín ni muntu ki?
Miguel Ángel Gil Marín, yavukiye i Madrid mu 1963, ni Umuyobozi Mukuru wa Atlético de Madrid kuva mu 2002.
Yinjiye muri iyi kipe mu mwaka wa 1993 nk’Umuyobozi Mukuru ushinzwe imiyoborere, nyuma aza kuyobora ibikorwa byayo nk’umuyobozi mukuru.
Mu gihe amaze ayobora Atlético de Madrid, iyi kipe yagize intambwe ikomeye mu mikino no mu miyoborere, irimo gutwara ibikombe bya LaLiga, UEFA Europa League na UEFA Super Cup, ndetse ikagera ku mukino wa nyuma wa UEFA Champions League inshuro ebyiri, mu 2014 no mu 2016.
Gil Marín afite umwanya ukomeye muri ruhago y’u Burayi.
Mu 2024 yatowe kuba umwe mu bagize Komite Nyobozi ya UEFA, ari na rwo rwego rufata ibyemezo by’ingenzi muri UEFA. Manda ye muri iyo Komite yari iteganyijwe kumara imyaka ine.
Mu mpera za 2025, Atlético de Madrid yatangaje ko Apollo Sports Capital yari kumvikana kugira uruhare runini mu migabane y’iyi kipe, mu gihe Gil Marín na Perezida Enrique Cerezo bakomeza kuyobora ikipe.
Mu mwaka wa 2026, Apollo Sports Capital yabaye umunyamigabane mukuru, naho Gil Marín akomeza kuba Umuyobozi Mukuru.
Kuba umuyobozi wo ku rwego rwo hejuru muri ruhago y’u Burayi nka Gil Marín ari umwe mu bazita ingagi izina muri Kwita Izina, bifasha kandi gukomeza guhuza siporo, ubukerarugendo, kubungabunga ibidukikije n’iterambere ry’abaturage.
