Ubutegetsi bwa gisirikare bwa Guinea-Bissau bwabujije uwahoze ari Perezida, Umaro Sissoco Embaló, kugaruka mu gihugu, buvuga ko umutekano we utizewe.
Embaló yayoboye iki gihugu kuva mu 2020, aza guhirikwa ku butegetsi.
Byari biteganyijwe ko kuri iki Cyumweru ari bwo azagaruka mu gihugu, kandi yari yaravuze ko naza aziyamamariza kuyobora iki gihugu.
Yagiye kuba muri Maroc ahunga ingabo zari zimaze gufata ubutegetsi mu Ugushyingo 2025.
Hari nyuma y’amatora yateje impaka aho we n’umukandida w’abatavuga rumwe na Leta bombi bavugaga ko batsinze.
Yabanje kujyanwa muri Senegal, hanyuma ajya i Brazzaville, nyuma ajya muri Maroc.
Mu Cyumweru gishize, Embaló yatangarije AFP na Jeune Afrique ko azagaruka i Bissau ku cyumweru tariki ya 4 Ukwakira, kandi ko azahatanira umwanya wa perezida mu matora yo ku wa 6 Ukuboza, 2026.
Yasabye ko kugaruka kwe kuzabera mu mahoro, mu bworoherane no mu bwubahane.
Ariko Inama Nkuru y’Ingabo yayoboye igikorwa cyo guhirika ubutegetsi yatangaje ko nta mutekano uhagije wo kwemeza ko uwahoze ari Perezida ashobora kwinjira mu gihugu atekanye.
Kugaruka kwe kwasubitswe kandi nta tariki yatangajwe yazemererwaho gutahuka.
Ku mbuga nkoranyambaga yavuze ko atavuye ku mugambi we wo gutahuka no kwitabira amatora, kandi ko yizeye ko inzego z’ubutabera zizasuzuma kandidatire ye mu bwisanzure, mu butabera no mu bwubahane.
Ibi bibaye mu gihe hari umwuka w’impagarara muri Politiki ya Guinea Bissau.
Umunyamategeko umwe yavuze ko mu butegetsi buriho harimo ibice bibiri: kimwe gishyigikiye kugaruka kwa Embaló, ikindi kitagishyigikiye.
Amakuru y’ibinyamakuru byo muri iki gihugu kandi avuga ko abasirikare b’inkoramutima ze bo mu barinda Perezida bambuwe intwaro barafungwa.
Ifoto@ Umaro Sissoco Embalo
