Iki ni icyemezo cyafatiwe mu nama y’Abakuru b’Ibihugu byo mu Karere k’Ibiyaga bigari iherutse kubera i Luanda muri Angola, u Rwanda rukaba rwari ruhagarariwe na Minisitiri w’ububanyi n’amahanga Dr Vincent Biruta. Abitabiriye iriya nama basabye abarwanyi badashaka Perezida Touadera gushyira intwaro hasi bakagana ibiganiro.
Itangazo ry’Abakuru ba biriya bihugu risaba abarwanyi kuva mu birindiro bashinze mu nkengero za Banqui bagasubira inyuma.
Iriya nama yatumijwe na Perezida wa Angola, João Manuel Gonçalves Lourenço, akaba ari we uyoboye Umuryango w’Ibihugu byo mu Karere k’Ibiyaga bigari.
Abayobozi b’ibihugu bitabiriye iriya nama barimo Faustin-Archange Touadera, Denis Sassou-Nguesso wa Congo-Brazzaville, Idriss Déby Itno wa Chad, Gen. Ibrahim Gabir uri mu Nama nkuru ya gisirikare iyoboye Sudan na Dr Vincent Biruta wari uhagarariye Perezida w’u Rwanda, Paul Kagame.
Itangazo basohoye rivuga ko bashyigikiye ubutegetsi bwa Touadera, kandi ko batazemera ko abarwanyi bamukura ku butegetsi kandi yaratowe n’abaturage.
Bemeranyije ko hagomba kubaho ibiganiro ku mpande zose zirebwa n’ibibazo biri muri Centrafrique kugira ngo bibonerwe umuti urambye.
Abakuru b’ibihugu byitabiriye iriya nama basabye Akanama k’Umuryango w’Abibumbye gashinzwe amahoro ku Isi gutangira kureba uko Centrafrique yakurirwaho ibihano byo gukomanyirizwa intwaro.
Iki gihugu cyakomanyirijwe intwaro guhera muri 2013.
Chad na Sudan: Indiri y’abarwanyi
eMu biganiro bagiranye, Abakuru b’ibihugu bitabiriye iriya nama batangaje ko bafite amakuru y’uko muri Sudan na Chad hari indiri y’abarwanya ubutegetsi bwa Touadera.
Bavuze kandi ko amakuru atangwa n’inzego z’iperereza avuga ko bariya barwanyi bakomeje guhabwa intwaro nyinshi kandi zikomeye, zo kwifashisha kugira ngo basahure abaturage kandi bahirike ubutegetsi bwatowe n’abaturage.
Rwagati muri Mutarama, 2021 hari amakuru yatangajwe ko abasirikare bari mu butumwa bwa UN muri kiriya gihugu bishe abarwanyi 37, abandi batanu bafatwa mpiri.
Tariki 24, Mutarama, 2021 hari igitero gikomatanyije abasirikare ba MINUSCA n’aba Centrafrique cyagabwe ku barwanyi bari baherereye mu bilometero 90 uturutse i Bangui kibicamo 44 ndetse hafatwa abacanshuro benshi bemeye ko baturutse muri Chad no muri Sudan.
Kugeza ubu abasirikare barindwi barimo n’umwe waturutse mu Rwanda ‘nibo batangajwe’ ko biciwe mu bitero bya bariya barwanyi.
Minisitiri w’umutekano no gusana igihugu witwa Marie-Noëlle Koyara aherutse gushima uruhare rw’ingabo z’u Rwanda mu kuhangana n’abarwanyi bashaka guhirika ubutegetsi bwa Touadera.
Yasabye ingabo z’ibihugu byo mu Karere ruherereyemo kurwigana bigatabara Centrafrique.
Ivomo: The New Times
