Dukurikire kuri

Icyorezo COVID-19

Abatuye Isi Babe Bitegura Urukingo Rwa Kane Rwa COVID-19

Published

on

Mu gihe hari abatuye Isi batarabona urukingo rwa mbere rwa COVID-19, hari igihugu cyabwiye abaturage bacyo kwitegura guhabwa urukingo rwa kane rw’iki cyorezo. Ni Israel.

Minisitiri w’Intebe w’iki gihugu Naftali Benett yaraye abwiye abaturage be batarahabwa urukingo rwa gatatu rwa COVID-19 kugira vuba bakaruhabwa kugira ngo imibiri yabo urumenyere hakiri kare kuko hari gahunda yo kuzabaha urw kane mu gihe kitarenze iminsi 180.

Israel niyo yabaye iya mbere ku isi mu gukingira abaturage bayo bose ku nshuro ya mbere, ni iya kabiri ni ko byagenze, ubu ikaba iri gukingira abaturage bayo ku nshuro ya gatatu.

Naftali Bennett yavuze ko abatuge b’igihugu cye bageze mu zabukuru ari bo bazaba aba mbere guhabwa ruriya rukingo.

Abo Israel iteganya guheraho ni abaturage bayo bafite imyaka 60 kuzamura.

Urukingo Abanya Israel batewe ni Pfizer.

Muri Amerika naho batangiye gutegura uburyo bwo kuzakingira abaturage  babo mu gito kiri imbere.

Minisitiri w’ubuzima wa Israel Nitzan Horowitz avuga ko Guverinoma yasabye ko abaturage ba Israel bahabwa urukingo rwa kane kandi ngo bigomba gutangira bitarenze amezi ane ari imbere.

Minisitiri w’Intebe wa Israel Naftali Benett yavuze ko ingabo, Polisi n’abandi bakora mu nzego z’ubuzima bagomba gutegura uko ikingira rya kane rizakorwa.

Kuri iyi ngingo kandi hiyongereyo indi yatanzwe n’Itsinda rya Israel rishinzwe kurwanya COVID ryitwa Pandemic Response Team ivuga ko igihe umuntu wakingiwe akwiriye kongera guhabwa urundi rukingo kigiye kugabanywa kikava mu mezi atanu kiba amezi atatu.

Hari abatuye Isi batarakingirwa COVID-19 byibura inshuro imwe…

Mu gihe Israel ishaka gukingira abaturage bayo, hari ahandi ku isi mu bihugu byinshi cyane cyane ibyo muri Afurika abaturage batarahabwa urukingo na rumwe!

Ibi byatewe n’uko ibihugu bikize byikubiye inkingo zirenga 80% by’izakozwe ku ikubitiro n’izindi zikorwa muri iki gihe zikaba zidakwirakwizwa ku isi mu buryo bungana.

Ikindi kibitera ni uko kugeza ubu nta gihugu cyakwizera ko abaturage bacyo bakingiwe mu buryo budasubirwaho.

‘Uburyo budasubirwaho’ bushatse kuvuga ko abakingiwe bagomba kuba barubatse ubudahangarwa burambye k’uburyo batazongera kwandura kiriya cyorezo.

Ibi rero biragoye kubera ko imiterere ya virusi itera uburwayi bwa COVID-19 yihinduranya kenshi kandi mu buryo butari bwitezwe.

Omicron ivugwa muri iki gihe ifite ubushobozi bwikubye 32 ubwo Delta yari ifite mu mwaka wa 2020 ubwo yacaga ibintu ku isi.

Nta muhanga wakwihandagaza ngo avuge ko ari neza igihe iriya virusi izaba yaracikiye intege mu buryo budasubirwaho.

Advertisement
Advertisement