Ikigo cy’itumanaho cya Airtel Rwanda cyizihije Icyumweru cyahariwe serivisi ku bakiliya, gisura abakiliya aho batuye kugira ngo kibashimire imikoranire bafitanye, kibatege amatwi kandi cyige icyo cyakora kugira ngo kirusheho kunoza serivisi kibaha.
Airtel Rwanda yatangaje ko abakozi bayo baganiriye n’abakiliya ku byo bishimira muri serivisi zitangwa n’iki kigo, zirimo izamurikwa ku bukangurambaga bwa #IBIRENZE, ndetse banakusanya ibitekerezo byabo ku bunararibonye bafite mu kuzikoresha.
Ibi byari bifite intego yo gushimangira umubano hagati ya Airtel n’abakiliya bayo, hashingiwe ku butumwa bugira buti: “Gutanga serivisi nziza bitangirira ku gutega amatwi abo tuziha.”
Iyi gahunda ije mu gihe Ikigo cy’Igihugu cy’Iterambere (RDB) cyasubukuye ubukangurambaga bwa Na Yombi, bugamije guteza imbere serivisi nziza zihabwa abakigana, bukaba bufite insanganyamatsiko igira iti: “Reka turenze ibyo dusabwa mu gutanga muri serivisi nziza.”
Ku wa 8 Ukwakira 2026, RDB n’abafatanyabikorwa baturuka mu nzego za Leta n’iz’abikorera batangije ubu bukangurambaga bushya, mu rwego rwo kongera imbaraga mu bikorwa byo kuzamura ireme rya serivisi zihabwa abaturage mu Rwanda.
Ubukangurambaga bwa Na Yombi bwatangijwe bwa mbere mu 2012, bugamije guteza imbere umuco wo kwita ku bakiliya no gukangurira abantu kumenya ko bafite uburenganzira bwo guhabwa serivisi nziza.
RDB kandi iri kureba uburyo hashyirwaho sisitemu imwe yakusanyirizwamo amakuru ajyanye n’imikoranire n’abakiliya, yaba ayavuye ku guhamagara kuri telefoni, ubutumwa bwo kuri imeli, ibirego cyangwa ibiganiro n’abakozi biba imbonankubone.
Iyi sisitemu izafasha kumenya ibibazo bikigaragara mu itangwa rya serivisi no gukurikirana uko bikemurwa.
Iki kigo kivuga ko gikurikirana dosiye zirenga 500 z’ibikorwa by’ubucuruzi n’ibijyanye n’ubujyanama, ndetse kikakira na nomero zirenga miliyoni imwe z’abantu bagihamagara kuri telefoni.
Ubukangurambaga bwa Na Yombi bwongeye gushyira imbere ihame ry’uko umuntu uhawe serivisi akwiriye guhabwa amakuru asobanutse, gusubizwa mu gihe gikwiye no gukurikiranirwa ikibazo mu gihe cyaba cyavutse.
Ku ruhande rwa Airtel Rwanda, gusura abakiliya no kuganira na bo imbonankubone ni uburyo bwo kumenya ibitekerezo byabo biturutse kuri bo ubwabo, aho kubishingira gusa ku makuru atangwa n’abandi.
Icyakora, agaciro nyako k’ibi bikorwa kazagaragarira mu gihe abakiliya bazabona ko ibitekerezo batanze byagize uruhare mu kunoza serivisi bahabwa.
