Kuri uyu wa Gatanu nibwo umukino waraye uhuje Rayon Sports na Gorilla FC wabaye urangira Rayon yitsinze igitego kimwe ndetse utangwamo amakarita ane atukura n’andi y’umuhondo, yose hamwe akaba yari amakarita 13.
Wakiniwe kuri Kigali Pelé Stadium kuri uyu wa Gatanu, tariki ya 9 Ukwakira 2026.
Rayon Sports yabonye Coup franc hafi y’izamu, iterwa na Iradukunda Elie Tatou ariko ayikubita mu rukuta, Akayezu Jean Bosco atera umupira kure, aba akijije izamu.
Ku munota wa 10, Ishimwe Elie Ganijuru yashatse gutsinda ateye ishoti riremereye ariko umuzamu wa Gorilla FC witwa Cyuzuzo Aimé Gaël amubera ibamba, Kameni Junior ashatse kuwusobyamo akora ikosa.
Sunday Inemesit wa Gorilla FC yazamukanye umupira asiga Uwumukiza Obed, acenga Nshuti Didier mu rubuga rw’amahina, awutanze ngo bagenzi be batsinde, habura ukoraho ngo umupira ujye mu izamu.
Aho aboneye ko ikipe bahanganye ikomeye, umutoza wa Gorilla FC, Kirasa Alain, yarushijwe yakuyemo Chancellor Mengue Ndong, ashyiramo Mosengo Tansele.
Byabaye nk’ibikomye mu nkokora imikinire ya Rayon Sports bituma umukino urangira ari ubusa ku busa.
Mu gice cya kabiri, Gorilla FC yagerageje gufunga neza impande za Rayon Sports, kirinda kirangira nta mupira n’umwe inyujijeho iwujyana mu rubuga rw’amahina, kandi no hagati ntibyari byoroshye nyuma y’uko Tansele agiye mu kibuga.
Aha ahubwo habayemo amakosa menshi ya Rayon Sports, anavuyemo ikarita y’umuhondo yeretswe Ishimwe Ganijuru Elie.
Haringingo Francis Christian utoza Rayon Sports yaje gukora impimduka akura mu kibuga Nisingizwe Christian, ashyiramo Muhoza Daniel.
Ku munota wa 53, rutahizamu wa Gorilla FC, Sunday Inemesit, yihawe umupira muremure ariruka asiga Charles Tchouplaou, awufashe awuhindura mu rubuga rw’amahina, Nshuti Didier wahoze muri Gorilla FC yitsinda igitego.
Nyuma y’igitego Rayon Sports yakuyemo Iradukunda Elie Tatou ishyiramo Nizeyimana Mubaraka, naho Gorilla FC ishyiramo Karenzo Alexis wahawe umwanya na Ishimwe Aime Thierry.
Rayon Sports yongeye kwisubiraho mu minota 20 ya mbere, ijya gushaka igitego gusa ubwugarizi bwa Gorilla FC n’umunyezamu bagakomeza kuba ibamba.
Ku munota wa kane w’inyongera, Masudi Narcisse wa Gorilla FC yeretswe ikarita y’umutuku nyuma y’ikosa rya kabiri ry’umuhondo, bivamo imvururu zatejwe na Akayezu Jean de Dieu, umutoza w’abanyezamu, Mazimpaka André, na we ahabwa umutuku.
Sunday Inemesit wabwiye nabi umusifuzi wa mbere wungirije, Mutuyimana Dieudonne, nawe ahabwa umutuku.
Nyuma y’umunota umwe Nshuti Didier wa Rayon Sports na we yeretswe umutuku kubera gushyamirana na Akayezu wa Gorilla.
Usibye amakarita ane atukura, uyu mukino wabonetsemo n’amakarita y’umuhondo icyenda, harimo arindwi ya Gorilla FC n’abiri ya Rayon Sports.
Uwikunda Samuel wasifuye uyu mukino yawurangije atiriwe yongeraho iminota y’inyongera, byongera guteza impaka hagati y’abasifuzi n’abakinnyi ba Rayon Sports gusa nta kindi cyari gukorwa.
Umukino warangiye Rayon Sports yatsinzwe na Gorilla FC igitego 1-0, uba umukino wa gatanu wikurikiranya nta ntsinzi ibona.
Gorilla FC yatsinze umukino wa kabiri muri BK Pro League, igira amanota atandatu mu mikino itatu, mu gihe Rayon Sports ya 15 ifite inota rimwe gusa.
Umukino uzakurikiraho, Rayon izakina na Black Bulls yo muri Mozambique muri CAF Confederation Cup, kuri Stade Amahoro, ku wa 17 Ukwakira 2026.
