Menu
Indimi
Advert

Icyorezo COVID-19

Amafoto: Gukingira COVID-19 Byongerewe Imbaraga Mu Turere 18

Yanditswe kuwa

Mu gihe gukingira COVID-19 mu Rwanda byageze ku bafite imyaka 18, gahunda yo gukingira abantu benshi yarenze Umujyi wa Kigali, igera mu Turere 18 two hirya no hino mu gihugu twakunze kugaragaramo ubwandu buri hejuru. 

Mu turere twa kure, hagiye hifashishwa kajugujugu za gisirikare nk’uko bisanzwe, kugira ngo inkingo zivanwe mu bubiko bwa leta mu Mujyi wa Kigali zegerezwe abazazihabwa, ahandi hakifashishwa imodoka.

Kuri uyu wa Kabiri Umunyamabanga wa Leta muri Minisiteri y’Ubuzima, Dr Mpunga Tharcisse, yatangaje ko kohereza inkingo mu Ntara byatangiye kuva mu gitondo cya kare, ku buryo uturere twose twaraye tuzibonye, hasigaye kuzigeza ku bigo nderabuzima zizatangirwaho.

Kuri uyu wa Gatatu gahunda yari ugukingira hibanzwe ku bakuze, abari mu byago byo kuzahazwa na COVID-19 nk’abafite indwara zikomeye, n’abakora imirimo ituma bahura n’abantu benshi ku buryo ibyago byo kwandura biri hejuru.

Dr Mpunga yagize ati “Hari uturere umunani twahawe inkingo zigenewe abantu bari babonye urukingo rwa mbere bageze igihe cyo guhabwa urukingo rwa kabiri, hakaba n’imijyi minini yunganira Kigali nayo yahawe inkingo kugira ngo na yo itangire gukingira abantu bari mu byiciro by’ubucuruzi bitandukanye, nk’uko birimo gukorwa muri Kigali, guhera ku myaka 18 kuzamura.”

Akarere ka Musanze ni kamwe mu twahawe inkingo nyinshi, aho katangaje ko ari 22,002. Zakiriwe n’Umuyobozi w’Ibitaro bya Ruhengeri, Dr Muhire Philbert.

I Musanze inkingo zahagejejwe na kajugujugu ya gisirikare

Akarere ka Bugesera ko katangaje ko abantu bafite imyaka 18 kuzamura bari guhabwa urukingo rwa mbere, igikorwa cyabereye ku kigo cy’urubyiruko cya Nyamata.

Ni inkingo 5000 ziri guhabwa abantu bari mu byiciro by’abantu bigaragara ko akazi bakora katuma bahora mu ngendo. 30% by’abazihabwa ni abageze muzabukuru, 70% ni ibindi byiciro.

Mu karere ka Bugesera gahunda z’ikingira zirakomeje

Mu karere ka Kamonyi harimo gukingirwa abakuze n’abakora imirimo ituma bahura n’abantu benshi

Umubyeyi wo ku Kamonyi arimo gukingirwa COVID-19

Akarere ka Rubavu nako kakiriye inkingo 22,000 zagejejweyo n’indege za gisirikare.

Zagenewe abaturage barimo abamotari, abacuruzi ndetse n’abakuze bacikanwe ku cyiciro cy’ikingira giheruka.

Zirimo gutangirwa mu Bigo Nderabuzima ndetse no kuri site zatoranyijwe.

Izi nkingo zatangiye guhabwa abaturage kuri uyu wa Gatatu

Akarere ka Rubavu ni kamwe mu twitaweho cyane mu gukingira

Mu karere ka Rusizi, guhera kuri uyu wa Gatatu mu bigo nderabuzima 19 biri mu karere harimo gutangirwa urukingo rwa COVID-19, doze ya 2, ku baturage bagejeje igihe cyo kuyifata.

Rusizi ni kamwe mu turere turimo gutangirwamo urukingo rwa kabiri

Ahandi habereye igikorwa cy’ikingira ku bantu benshi, ni mu karere ka Nyagatare nyuma yo kwakira inkingo za Covid-19 zigera ku 18,000.

Zakiriwe kuri yuyu wa Kabiri, zirara zigejejwe ku bigo nderabuzima ku buryo kuri uyu wa Gatatu zatangiye guhabwa abaturage bakuze kuva ku myaka 18.

Mu karere ka Kayonza naho barimo gutanga urukingo rwa kabiri rwa COVID-19, igikorwa kirimo kubera mu bigo nderabuzima 15 biri mu karere.

Mu karere ka Kayonza abaturage bitabiriye guhabwa urukingo rwa kabiri

Mu karere ka Huye, harimo gutangwa urukingo rwa mbere rwa COVID-19 ndetse n’urwa kabiri ku bagejeje igihe.

Mu bahawe urukingo rwa mbere harimo abakozi n’abanyeshuri ba IPRC Huye batari barakingiwe COVID-19 barimo guhabwa doze ya mbere mu kigo. Intego ihari ni uko bose bakingirwa. Turasaba abakingiwe gukomeza kubahiriza amabwiriza yo kwirinda COVID-19.

Abarimu n’abanyeshuri ba IPRC Huye bakingiwe

Leta y’u Rwanda yongereye imbaraga mu gukingira COVID-19, nyuma y’uko nibura buri wa Mbere yakira inkingo zirenga ibihumbi 200 nk’uko biheruka gutangazwa na Minisiteri y’Ubuzima.

Byatumye iva ku gukingira abantu barengeje imyaka 40 igera ku barengeje imyaka 18, mu gikorwa cyo gukingira abantu benshi kuzamara ibyumweru bibiri.

Byongeye, mu cyumweru gishize u Rwanda rwakiriye inkingo 200,000 za Sinopharm rwahawe n’u Bushinwa, n’izindi 489,060 za Pfizer rwahawe na Leta zunze Ubumwe za Amerika.

Izo nkingo ni abantu hafi 350,000 bahise babona uburyo bwo gukingirwa byuzuye, mu nkingo zabonetse umunsi umwe.

Kugeza ubu abamaze gukingirwa bose hamwe ni miliyoni 1.15, mu gihe abahawe inkingo ebyiri ziteganywa ari ibihumbi 445.

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement