Ushinzwe ibikorwa muri Ambasade ya Leta zunze ubumwe z’Amerika mu Rwanda(Chargé d’Affaires) witwa Deb MacLean yatangaje ko igihugu cye cyahaye u Rwanda inkingo 254,400 za COVID-19 zigenewe gukingira abana bafite hagati y’imyaka itanu n’imyaka 11 y’amavuko.

Itangazo Ambasade y’Amerika yasohoye rivuga  ko ziriya nkingo zatanzwe mu rwego rwo gushyira mu bikorwa isezerano Perezida Joe Biden yatanze ryo gutanga inkingo Miliyari zigenewe gufasha abatuye isi gukingira abantu mu guhangana na COVID-19.

Excited to announce more US government donated vaccines to Rwanda’s people! The latest donation of 254,400 COVID-19 doses protects Rwandan children aged 5-11. This is part of a 1 billion dose commitment made by President Biden in the global fight against COVID-19. #COVAX pic.twitter.com/td0CGjzgXM

— Chargé d'Affaires Deb MacLean (@USAmbRwanda) June 27, 2022

Leta zunze ubumwe z’Amerika ziri mu bihugu byahaye u Rwanda inkingo za COVID-19 nyinshi kurusha ibindi kugeza ubu.

Ni inkingo zo mu bwoko bwa Pfizer ndetse na Johnston&Johnston.

Mu mwaka wa 2021, Mu itangazo ubutegetsi bwa Perezida Joe Biden bwasohoye bwavuze ko mu ntangiro hari inkingo miliyoni 25 za mbere zatangiye koherezwa muri Afurika,  iki cyiciro cya kabiri kikaba kireba inkingo miliyoni 55 zari zisigaye.

Ryagiraga riti: “Muri izo nkingo zose, abafite ibyago byinshi byo kwandura nk’abakora mu nzego z’ubuzima bagomba gukingirwa mu ba mbere, hashingiwe kuri gahunda z’ikingira mu bihugu.”

Muri izo nkingo zose, 75% zatanzwe binyuze muri gahunda mpuzamahanga irimo gufasha ibihugu kubona inkingo za COVID-19, COVAX, naho 25% zihabwa igihugu byugarijwe n’ubwandu bwinshi.

Kuri iki cyiciro miliyoni 41 zashyizwe muri COVAX, miliyoni 14 zigenerwa ibihugu birimo ibyo muri Afurika nka Nigeria, Afurika y’Epfo, Kenya, Ghana, Cabo Verde, Misiri na Tunisia.

Mu nkingo zanyujijwe muri COVAX harimo miliyoni 14 zagenewe Amerika y’Epfo na Caraïbe na miliyoni 16 zagenewe ibihugu byo muri Aziya birimo u Buhinde.

Ninaho habarizwa inkingo zigera kuri miliyoni 10 zagenewe Afurika, zikazagabanywa ibihugu bizatoranywa mu bufatanye n’Umuryango wa Afurika yunze Ubumwe.

Mu gusaranganya icyiciro cya mbere cyari kigizwe n’inkingo miliyoni 25 ku wa 3 Kamena, 2021 inkingo miliyoni 19 zanyujijwe muri COVAX.

Muri izo harimo izigera kuri miliyoni 5 zigenewe Afurika, na zo zigomba gusaranganywa ibihugu bizatoranywa mu bufatanye n’Umuryango w’Afurika yunze ubumwe.

Inkingo zisigaye zigera kuri miliyoni 6 zashyizwe mu cyiciro cy’ibihugu bifite ubwandu bwinshi byatoranyijwe, birimo na Misiri.

Ubutegetsi bwa Biden buheruka gutangaza ko buzagura izindi nkingo miliyoni 500 za Pfizer, zizahabwa ibihugu 92 bikennye, ibiri mu nzira y’amajyambere n’ibigize Afurika yunze Ubumwe.

Zose zigomba kuba zatanzwe bitarenze Kamena 2022, harimo miliyoni 200 zigombaga gutangwa mbere y’uko uyu mwaka wa 2021 urangira.

Ishami ry’Umuryango w’Abibumbye ryita ku buzima, WHO, rivuga ko kugira ngo COVID-19 ihagarikwe bihaye intego yo gufasha ibihugu gukingira nibura 10% by’ababituye bitarenze Nzeri, na 40% mbere y’uko uyu mwaka wa 2021 urangira na 70% kugeza muri Kamena, 2022.

Umwaka ushize( 2021) ibihugu 52 bya Afurika byari bimaze gukingira 2% by’abaturage bose ba Afurika.