Padiri wo muri Paruwasi ya Nkanga mu Murenge wa Rweru mu Karere ka Bugesera witwa Gakuba Célestin yagonze abantu yicamo babiri undi arakomereka cyane. Yari atwaye imodoka ya Jeep Toyota Hilux RAE 001I .
Mu gitondo cyo kuri uyu wa Kabiri nibwo iyi mpanuka ikomeye yabaye, ibera mu Mudugudu wa Nzagwa, Akagari ka Kintambwe mu Murenge wa Rweru.
Abapfuye ni Mukandekezi Grâce w’imyaka 63 y’amavuko na Ndanyuzwe Umukundwa Happy w’imyaka ibiri.
Uwimana Béatrice w’imyaka 33 wakomeretse bikomeye ajyanwa kuvurirwa mu bitaro bya Nyamata.
Padiri Gakuba we yakomeretse intoki byoroheje ariko akigezwa kuri Sitasiyo ya Polisi ya Nyamata yaje kubyimba umutwe, ajyanwa kwa muganga.
Umuvugizi wa Polisi y’u Rwanda mu Ntara y’Uburasirazuba SP Hamdun Twizeyimana yatangaje ko iyo mpanuka yatewe n’umuvuduko ukabije.
Yagize ati:“Padiri yihutaga ajya gusoma Misa, akata ikorosi riramunanira agonga abagendaga n’amaguru, babiri bahita bapfa.”
SP Twizeyimana yavuze ko impanuka ikimara kuba Padiri yapimwe basanga nta bisindisha yanyoye.
Imibiri yabitabye Imana yajyanywe ku bitaro bya Nyamata.
