Ikipe y’u Rwanda, Amavubi, irakina na Cape Verde kuri uyu wa Kabiri tariki ya 29 Nzeri 2026, mu mukino w’umunsi wa kabiri wo mu itsinda K mu gushaka itike y’Igikombe cya Afurika cya 2027.
Uyu mukino urabera kuri Estádio Nacional de Cabo Verde i Praia, saa 17:00.
Amavubi arawinjiramo afite amanota atatu nyuma yo gutsinda Liberia ibitego 3-1 mu mukino wabereye kuri Stade Amahoro.
Abeddy Biramahire yafunguye amazamu mu minota ya mbere, Leroy-Jacques Mickels atsinda icya kabiri, mbere y’uko Sylvanus Nimely agabanya ikinyuranyo.
Joy-Lance Mickels yahise atsinda icya gatatu mbere y’uko igice cya mbere kirangira.
Cape Verde yo yatangiye nabi, itsindwa na Mali ibitego 3-1 i Bamako.
Iyi ntsinzi yabaye mbi nyuma y’urugendo rw’amateka yagize mu Gikombe cy’Isi cya 2026.
Cape Verde yakinnye bwa mbere Igikombe cy’Isi muri 2026, ndetse igera mu cyiciro cyo gukuranwamo.
Muri icyo cyiciro yahuye na Argentina, ifite igikombe, umukino urangira Argentina itsinze 3-2 nyuma y’iminota 120.
Nubwo yavuye muri iri rushanwa itsinzwe, Cape Verde yari yagaragaje ubushobozi bwo guhangana n’amakipe akomeye.
Mbere yo gutsindwa na Mali, Cape Verde yari ifite agahigo ko kumara igihe kinini idatsindwa mu minota 90 mu mikino itanu yaherukaga gukina.
Ku kibuga cyayo, naho ihafite umusaruro ushimishije.
Muri uyu mwaka, yakinnye imikino itatu ya gicuti iwabo, itsinda ibiri inganya umwe.
Amavubi aje afite ikizere
Ikipe y’u Rwanda iraza muri uyu mukino nyuma yo gutsinda imikino itatu yikurikiranya muri uyu mwaka.
Yatsinze Grenada ibitego 4-0, Estonia 2-0, ndetse itsinda Liberia 3-1 mu mukino wa mbere wo gushaka itike ya AFCON.
Joy-Lance Mickels ni umwe mu bakinnyi bitezweho gufasha Amavubi, nyuma yo kugira uruhare mu bitego by’ikipe mu mikino iheruka.
Imibare ya Tips.GG igaragaza ko u Rwanda rumaze gutera mu izamu [Shots on target ] inshuro 17 mu mikino itanu iheruka, mu gihe Cape Verde yo yateye inshuro enye gusa muri iyo mikino.
U Rwanda kandi rwatsinze ibitego 12 muri iyo mikino itanu, mu gihe Cape Verde yatsinze kimwe gusa.
Amateka y’Amavubi na Cape Verde
Aya makipe amaze guhura inshuro ebyiri, zombi mu gushaka itike ya AFCON 2021. Imikino yombi yarangiye 0-0.
Ku wa 12 Ugushyingo 2020, Cape Verde yanganyije n’u Rwanda i Praia, mbere y’uko nyuma y’iminsi itanu amakipe yombi akongera kunganya 0-0 i Kigali.
Bivuze ko nta kipe iratsinda indi mu mikino ibiri iheruka guhura.
Ku ruhande rwa Cape Verde, Jamiro Monteiro ni umwe mu bakinnyi bitezweho kuyobora umukino hagati mu kibuga no guhanga uburyo bwo gutera.
Constantine: “Twaje kugira icyo dukura muri uyu mukino”
Mu kiganiro n’itangazamakuru mbere y’umukino ,Umutoza w’Amavubi, Stephen Constantine, yavuze ko yubaha Cape Verde, ariko ko ikipe ye itagiye i Praia kwirwanaho gusa.
Ati: “Twaje hano kugira ngo tugire icyo dukura muri uyu mukino. Tuzagerageza kubona umusaruro mwiza.”
Constantine yashimiye Cape Verde ku byo yakoze mu gikombe cy’Isi, ariko avuga ko ubu amakipe yombi ahanganye mu gushaka itike ya AFCON.
Ati: “Cape Verde yaserukiye Afurika neza cyane. Yakinnye neza mu gikombe cy’Isi ariko ubu ni AFCON.”
Yavuze kandi ko abakinnyi be bamaze kumenyera nyuma y’urugendo, ndetse ko imyitozo ya mbere yabahaye icyizere.
Abakinnyi bashobora kubanzamo
Ku ruhande rwa Cape Verde, umutoza Humberto Bettencourt ashobora gukoresha uburyo bwa 4-2-3-1, aho Kevin Pina na Deroy Duarte bafasha mu kugarira Jamiro Monteiro agakina inyuma ya rutahizamu Ryan Mendes.
Cape Verde:
Umuzamu: Josimar Dias Vozinha
Ba Myugariro: Wagner Pina, Roberto Lopes, Diney Borges, Sidny Lopes Cabral
Abakina hagati: Kevin Pina, Deroy Duarte, Jamiro Monteiro, Garry Rodrigues, Gilson Benchimol
Rutahizamu : Ryan Mendes
Rwanda:
Ku ruhande rw’Amavubi, Stephen Constantine ashobora gukomeza gukoresha uburyo bwa 4-1-4-1, aho Djihad Bizimana aba imbere y’abugarira, mu gihe Joy-Lance Mickels aba arangaje abasatira.
Umuzamu: Ntwari Fiacre
Ba Myugariro:
Gilbert Byiringiro
Claude Niyomugabo
Phanuel Kavita
Ange Mutsinzi
Abakina hagati:
Bonheur Mugisha
Djihad Bizimana (Kapiteni)
Abataha izamu n’Abasutira imbere:
Abeddy Biramahire
Leroy-Jacques Mickels
Joy-Lance Mickels
Jojea Kwizera.
Leroy-Jacques Mickels na we ari mu bakinnyi bashobora gufasha Amavubi mu gihe yaba atangiriye ku ntebe, bitewe n’uruhare yagize mu bitego mu mikino iheruka.
Jimmy GATETE
TAARIFA RW
