Abo ni Col Désiré Lobo na Col Jean-Marie Diadia wa Diadia bari bakuriye ingabo za bataillon 3412 na 3307. Bararegwa ibyaha bine birimo guhunga imbere y’umwanzi, guta intwaro n’ibindi bikoresho, kurenga ku mabwiriza ya gisirikare no gushaka kwigarurira imitungo y’abaturage.
Bombi mu Cyumweru gishize nibwo bagejejwe imbere y’Urukiko rwa gisirikare rw’Intara ya Kivu ya Ruguru.
Bashinjwa uruhare mu ifatwa ry’umujyi wa Bunagana wafashwe n’inyeshyamba za M23 mu mezi ane ashize.
Abo basirikare bafungiye muri gereza ya Munzenze, bombi bari bakuriye ibikorwa bya gisirikare mu gace k’imirwano inyeshyamba zafatiyemo umujyi wa Bunagana.
Ku rubuga rwa Radio Okapi handitseho ko mu iburanisha ryabaye ku wa Gatatu ushize, abunganira abaregwa basabye ko barekurwa by’agateganyo kuko bagaragaza ko barwaye.
Abo basirikare bakuru bafunzwe kuva muri Nyakanga, 2022 urubanza rwabo ruzakomeza ku wa Gatatu w’iki Cyumweru, taliki ya 19 Ukwakira, 2022.
Ibyaha baregwa bibahamye bashobora gukatirwa igihano cy’urupfu.
