Imibare itangwa na Ministeri y’Ubuzima muri Uganda ivuga ko hari abandi bantu batatu bishwe na Ebola. Byatangajwe na Emmanuel Ainebyoona akaba ari umwe mu bayobozi muri Minisiteri y’ubuzima muri Uganda.
Kugeza ubu abantu 11 nibo imaze guhitana
Hari bamwe muri bo byamaze kwemezwa ko ari Ebola nyirizina yabahitanye mu gihe hari abandi ‘bikekwa’ ko ari yo.
Chimp Reports ivuga ko umuvugizi wa Ministeri y’Ubuzima yavuze ko muri bariya 11 bapfuye, abagera ku munani baguye mu ngo zabo naho batatu gusa nibo bapfiriye kwa muganga.
Ati: “Kugeza ubu abantu 25 bajyanywe kwa muganga, muri bo batandatu byemejwe ko banduye Ebola, naho abandi 19 bayikekwaho.”
Ainebyoona yavuze ko hari itsinda ry’abakozi ba Ministeri y’Ubuzima riri gukora urutonde rw’abantu baba barahuye n’abo byemejwe ko banduye Ebola.
Hamaze gukorwa urutonde rw’abantu 58 bahuye n’abantu banduye Ebola.
Mu ntangiriro z’iki cyumweru nibwo Uganda yatangaje ko hagaragaye umurwayi wa Ebola nyuma y’imyaka 10 iki cyorezo byemejwe ko cyacitse.
