Itangazamakuru ryo muri Repubulika ya Demukarasi ya Congo guhera kuri uyu wa Kane rivuga ko indwara ikomeye yitwa Ebola yongeye kugaragara mu Ntara ya Kasaï.
Ebola ni indwara mbi kuko uwo yafashe akenshi imuhitana.
Bimwe mu biyiranga ni ukuva amaraso ahantu hafi ya hose hari umwenge kandi yandura vuba.
Ikinyamakuru Le Phare cyo muri DRC cyanditse ko hari abantu 15 bishwe n’iriya ndwara kuva yaduka muri iriya Ntara.
Mubo yishe harimo n’abaganga babiri, ikintu gishobora gukura umutima abashinzwe kwita ku bayanduye.
Minisitiri w’ubuzima Dr. Roger Kamba niwe watangaje ko Ebola yagarutse mu gihugu, ikaba indwara yica 53,6 % by’abo yafashe muri kiriya gihugu kugeza ubu.
Guverinoma ya Repubulika ya Demukarasi ya Congo itangaza ko yashyizeho ingamba zo kurwanya ikwirakwira ry’iyi ndwara y’icyorezo.
Hagati aho ko Leta yatangije ubukangurambaga bwo kubwira abaturage uko Ebola yandura n’uburyo bwo kuyirinda.
Iyi ndwara kandi ikomoka ku yiswe Zaïre ikaba itarabonerwa urukingo.
Ishami ry’Umuryango w’Abibumbye ryita k’ubuzima rivuga ko hari inkingo 2 000 zonyine mu bubiko.
