Leta ya Eritrea yatangaje ko ihagaritse umubano wose na Ethiopia, nyuma y’uko iki gihugu gifashe icyemezo cyo gufunga Ambasade yacyo muri Eritrea no kwirukana abadipolomate 10 b’Abanya-Eritrea.
Bibaye mu gihe imirwano ikomeje gukaza umurego mu Majyaruguru ya Ethiopia.
Minisiteri y’Ububanyi n’Amahanga ya Eritrea yatangaje ko yafashe iki cyemezo mu rwego rwo kwihimura ku cyo yise igikorwa cya Ethiopia cyo ‘kwangiza umubano’ hagati y’ibihugu byombi.
Mu itangazo yashyize ku rukuta rwayo rwa X ku wa Kane, yagize iti: “Eritrea nta kundi yabigenza uretse guhagarika umubano wose wa dipolomasi na Ethiopia hamwe n’ingaruka zose bizagira.”
Mbere y’icyo cyemezo, Ethiopia yari yatangaje ko ifunze Ambasade yayo i Asmara, umurwa mukuru wa Eritrea, inategeka abadipolomate 10 bayo kuva ku butaka bwayo mu masaha 48 yagomba gukurikiraho.
Ethiopia yabashinje ibikorwa bibangamiye umutekano w’igihugu, mu gihe Eritrea yahakanye ibyo birego, ahubwo igashinja Ethiopia gushyigikira imitwe yitwaje intwaro igamije guteza umutekano muke muri Eritrea.
Uku kutumvikana kwa dipolomasi kwabaye mu gihe imirwano hagati y’ingabo za Leta ya Ethiopia n’ihuriro ry’imitwe yitwaje intwaro irimo umutwe wa TPLF, The Tigray People’s Liberation Front, ikomeje gufata indi ntera.
Ku wa Gatatu no ku wa Kane, i Addis Ababa, umurwa mukuru wa Ethiopia haturikiye ibisasu biremereye, kandi mu gace ka Afar, mu Majyaruguru y’igihugu naho havugira ibisasu nk’ibyo.
Ethiopia ishinja Eritrea, Sudan na Misiri gushyigikira ihuriro ry’imitwe irwanya ubutegetsi buriho, ariko Eritrea yahakanye kugira uruhare muri ibyo bikorwa.
Mu mwaka wa 2018, Asmara na Addis Ababa byari byongeye kubana neza binyuze mu buhuza bwari bwakozwe na Amerika, Minisitiri w’Intebe wa Ethiopia Abiy Ahmed abigiramo uruhare.
Icyakora mu mwaka wa 2022 haje kubura indi ntambara yamaze imyaka ibiri nayo iza guhagarara binyuze mu masezerano yasinyiwe i Pretoria muri Afurika y’Epfo.
Kuba iyi ntambara yongeye kwaduka mu gihe muri Sudani hari indi ntambara ndetse n’ibyo muri Sudani y’Epfo ishyamba rikaba ritari ryeru, biteje umuryango mpuzamahanga guhangayikishwa n’ingaruka zabyo.
Afurika yunze ubumwe yasohoye itangazo risaba ibihugu byose bivugwa muri iki kibazo gucururuka, intambara igahagarara itararika ingogo.
