Nyuma y’amagambo akomeretsa yakorewe umusifuzi mpuzamahanga w’Umunyarwandakazi witwa Rhadia Salma Mukansanga mu mpera z’icyumweru cyarangiye Taliki 22, Mutarama, 2023, FERWAFA yatangije iperereza kuri iki kibazo.
Byabaye nyuma y’umukino wahuje Kiyovu Sports na Gasogi United ukarangira amakipe yombi anganyije 0-0.
Ntibyashimishije abafana ba Kiyovu Sports kuko bamwe muri bavuze amagambo y’urukozasoni kuri Salma Mukansanga.
Hari n’abashatse kumukubita.
Umuvugizi wa FERWAFA, Jules Karangwa, yabwiye BBC ko bakiriye raporo y’abayobozi b’umukino, ikaba raporo yavugaga ku byahabereye .
Iyo raporo bayishyikirije Komite ishinzwe imyitwarire ngo ibikoreho iperereza.
Karangwa ati: “Raporo ivuga ko umusifuzi yibasiwe abwirwa amagambo yo kumutuka na bamwe mu bafana ba Kiyovu, harimo no kumwibasira ku buryo bw’umubiri kuko bamwe bashatse kumukubita bakabuzwa n’abashinzwe umutekano.”
Hasanzwe hariho ibihano bihabwa ikipe izira abafana bayo b’imyitwarire idahwitse.
Biterwa n’uko biba bigoye guhana umufana utazi neza uwo ari we.
Kimwe muri byo ni uko hamezwa umukirno runaka iyo kipe izakina ariko nta mufana uhari.
Hari abafana ba Kiyovu bise Mukansanga Salma indaya, n’andi magambo mabi.
Mukansanga, ni umusifuzi mpuzamahanga w’umunyarwandakazi uheruka kwandika amateka yo kuba mu itsinda rya mbere ry’abagore basifuye igikombe cy’isi cy’abagabo.
Hagati aho Komite ishinzwe imyitwarire iracyakora iperereza kuri raporo yashyikirijwe.
Kiyovu Sports iri ku mwanya wa kabiri muri shampiyona y’u Rwanda ikaba inganya amanota 30 na AS Kigali ya mbere.
Gasogi United ni iya kane n’amanota 28.
