Menu
Indimi
Advert

Imikino

Ibihugu 12 Bigiye Guhurira i Kigali Muri BAL Izakinwa Ku Nshuro Ya Mbere

Yanditswe kuwa

Ubuyobozi bwa Basketball Africa League (BAL) bwatangaje ko irushanwa rizahuza amakipe 12 y’intyoza muri uyu mukino muri Afurika, rizakinwa bwa mbere kuva ku wa 16-30 Gicurasi, muri Kigali Arena.

BAL yagombaga kuba hagati ya Werurwe na Gicurasi 2020, ikabera mu bihugu bitandatu bya Afurika ariko igasorezwa i Kigali. Yaje gusubikwa kubera icyorezo cya Coronavirus cyibasiye Isi.

Umuyobozi wa Baksetball Africa League Amadou Gallo Fall wo muri Senegal, kuri uyu wa Mbere yatangaje ko iri rushanwa noneho rigiye kuba, ariko imikino yose ikazabera mu Rwanda.

Ati “Kuva twakwemeza isubikwa ry’irushanwa rya mbere rya BAL kubera iki cyorezo, twamaze igihe kinini tureba uburyo bwiza bwatwemerera gutangira iri rushanwa buri wese atekanye. Uyu munsi nishimiye gutangaza ko irushanwa rya mbere rya BAL rizatangira ku wa 16 Gicurasi, umukino wa nyuma ukaba ku wa 30 Gicurasi.”

“Ni amakipe 12 azaturuka mu bihugu 12 bitandukanye bya Afurika, imikino 26 yose ikazabera ahantu hamwe, muri Kigali Arena iri ku rwego rw’isi, i Kigali mu Rwanda.”

Fall yavuze ko intego yabo ari ukubaka irushanwa ryo ku rwego rwo hejuru, rizagaragaza impano nyafurika, ibyishimo n’urukundo rufitiwe Basketball.

Yakomeje ati “Hamwe n’umufatanyabikorwa wacu FIBA, twashyizeho shampiyona nyafurika ya Basketball ngo itange umwanya ku bakinnyi babigize umwuga kuri uyu mugabane ngo bagaragaze impano zabo mu rugo, banarusheho gushishikariza abahungu n’abakobwa bakiri bato kugana uyu mukino.”

Mbere yo gusubikwa byateganywaga ko amakipe azakina BAL 2020 azagabanywa mu duce dutandukanye, agakinira mu mijyi ya Cairo mu Misiri, Dakar (Sénégal), Lagos (Nigeria), Luanda (Angola), Monastir (Tunisia) na Salé (Maroc), Kigali (Rwanda) ikakira imikino ya nyuma muri Gicurasi 2020.

Amakipe 12 yabonye itike yo gukina Basketball Africa League ku nshuro ya mbere ni Patriots (Rwanda), GNBC (Madagascar), Ferroviario de Maputo (Mozambique), AS Douanes (Sénégal), AS Police (Mali), AS Sale (Maroc), GS Petroliers (Algérie), FAP (Cameroun), Petro de Luanda (Angola), Rivers Hoopers (Nigeria), Union Monastir (Tunisia) na Zamalek (Misiri).

Tanga igitekerezo

Tanga igitekerezo

Your email address will not be published. Required fields are marked *

Advertisement
Advertisement
Advertisement
Advertisement
Advertisement
Advertisement
Advertisement Enter ad code here