Abasirikare bari ku butegetsi muri Niger bihanije Ubufaransa babusaba kutongera kuvogera ikirere cy’igihugu cyabo kubera ko imipika yose ifunze.
Bongeyeho ko uretse kuba Ubufaransa bwavogereye ikirere cya Niger, ngo bwafashije abakora iterabwoba kubona uko bava mu gihugu.
Ibi ariko i Paris barabihakana.
Hari video yaraye icaracara ku mbuga nkoranyambaga yerekana Umuvuguzi w’ingabo zahiritse uwahoze ayobora Niger avuga ko Abafaransa baraye bafashije abantu 16 bari bakurikiranyweho ibyaha by’iterabwoba gutoroka.
Colonel Amadou Abdramane avuga ko bariya bantu bari barafashwe nyuma y’uko unugambi wabo wo gutera ibisasu ku bice bituriye Niger utahuwe.
Bamwe muri abo bantu bafashwe nyuma y’uko bagabye igitero ku ngabo zirinda Umukuru w’igihugu ziri ahitwa Bourkou Bourkou, aka kakaba ari agace gaturiye ikirombe cya zahabu kinini kiba i Tillaberi.
Colonel Amadou Abdramane yavuze ko indege nini yo mu bwoko bwa Hercule y’ingabo z’Ubufaransa yavogereye ikirere cya Niger kandi izi neza ko gifunze guhera ku Cyumweru taliki 06, Kanama, 2023.
Minisiteri y’ububanyi n’amahanga ndetse n’imibanire y’Ubufaransa n’Uburayi yatangaje, yo ku rundi ruhande, yatangaje ko ibyo abayobora Niger muri iki gihe bavuga nta shingiro bifite kubera ko ibyakozwe bisanzwe byemewe hashingiwe ku masezerano Paris yagiranye na Niamey mbere ya coup d’état yakuyeho Perezida Bazoum.
Kuba u Bufaransa bufite abasirikare 1500 bakambitse muri Niger ni ikintu gihangayikishije ubutegetsi bw’i Paris kubera ko abategeka Niger muri iki gihe basa n’abacanye umubano n’Ubufaransa.
Mu gihe ibintu ari uko bihagaze muri iki gitondo, mu masaha y’umugoroba wo kuri uyu wa Gatatu taliki 09, Kanama, 2023 hatangajwe ko hari umutwe wa gisirikare wadutse ngo uhangane n’abahiritse ubutegetsi.
Niger: Hadutse Umutwe Wa Gisirikare Urwanya Abahiritse Ubutegetsi
