Ingabo Za Leta Zunze Ubumwe za Amerika zakoze urukingo rwihariye kuko rukingira umubiri virus itera icyorezo cya COVID-19, n’izindi coronavirus zose zishobora kuwufata.
Ni urukingo rutagira ingaruka ku warutewe nk’uko bisanzwe ku zindi nkingo eshatu zirimo gukoreshwa cyane, zakorewe muri USA no mu Burayi.
Abashakashatsi bo mu kigo cy’ubushakashatsi cy’igisirikare cya USA cyitwa Walter Reed Army Institute of Research (WRAIR), bavuga ko urukingo bakoze rufite ubushobozi bwinshi mu guha uwarutewe ubudahangarwa kuri COVID-19 kandi rukamurinda n’izindi virusi zo mu bwoko bwa corona.
Uwahawe ruriya rukingo kandi ntashobora kwandura ya ndwara y’umusonga iterwa na virus bita SARS-CoV-1, iyi ikaba yarazahaje abantu mu mwaka wa 2002.
Muri iki gihe ruri kugeragerezwa ku basirikare barobanuwe bafite hagati y’imyaka 18 na 55 y’amavuko.
Ku rundi ruhande, muri USA nabo bugarijwe n’ubwoko bushya bwa COVID-19 bwiswe B117, ubu bwoko bukaba bwaratangiriye mu Bwongereza.
Ubwoko bushya bwa Coronavirus bwaje no kuvumburwa muri Afurika y’Epfo no muri Brazil, bugera New York, California no mu Buhinde. Ubu bwugarije ibihugu byinshi ku isi.
Kubera imiterere ya virus itera COVID-19, abahanga basanze mu gihe kiri imbere bizaba ngombwa ko inkingo nyinshi zizajya zongererwa imbaraga kubera ko iriya virusi yifitemo ubushobozi bwo guhindura imikorere yayo, ikaba yagira ubukana butari buzwi.
Ibi kandi bizatuma abantu bazajya baterwa urukingo kenshi kugira ngo bongerere abasirikare b’umubiri ubundi budahangarwa.
Ubundi virusi zitera COVID-19 yitwa SARS-CoV-2, mu gihe itera wa musonga twavuze haruguru zitwa SARS-Cov-1.
Icyo ingabo za USA ziri gukora ni ugukora urukingo rufite ibikenewe byose kugira ngo rukumire COVID-19 n’izindi virusi zimeze nkayo zizaza mu gihe kiri imbere.
Ikoranabuhanga urukingo rw’ingabo za USA rukoranywe ryitwa ‘ferritin nanoparticle vaccine platform.’
Ni ikoranabuhanga rituma utewe ruriya rukingo aba akingiwe n’izindi coronavirus kandi ibimenyetso by’umubiri bikurikira iterwa rw’urukingo COVID-19 ntibibeho.
Ntirukenera kandi kubikwa ahantu hakonja cyane nk’uko byari bimeze ku zindi nkingo zikoreshwa hirya no hino mu gukingira COVID-19, cyane cyane urwa Pfizer-BioNTech.
