Mu Ijambo yagejeje ku baturage ba DRC, uwigeze kuyobora iki gihugu Joseph Kabila Kabange yavuze ko hari ingingo 12 ubutegetsi bwa Kinshasa bugomba kwitaho muri ibi bihe.
Izi ni izi zikurikira:
1. Guhagarika ubutegetsi bw’igitugu:
Kabila avuga ko guhagarika imiyoborere y’igitugu ari byo bya mbere bikwiye guhita bikorwa.
Kabila yasobanuye ko Kinshasa itegekesha gukura abantu umutima ngo batayijora, akemeza ko ibyo ibikoreshamo iterabwoba.
2. Guhagarika intambara
Asanga kimwe mu byihutirwa ubu ari uguhagarika ntambara n’ibindi bibazo by’umutekano bikomeje kugaragara kandi bigakorwa vuba.
3. Kugarura ububasha bwa Leta mu gihugu
Asanga Kinshasa ikwiye gukora k’uburyo ubuso bwose bw’igihugu bugenzurirwa hamwe, ubusugire bw’igihugu bugakwira hose.
4. Kugarura Demukarasi:
Ibiba byose bikwiye kujyanirama no gusubiza igihugu ku mahame shingiro y’imiyoborere yubahiriza amategeko, aho amategeko aba ari yo agenga bose.
5. Kugarura uburenganzira bw’ibanze:
Gusubiza abaturage bose ubwisanzure n’uburenganzira bwabo bw’ibanze ntihagire abahezwa ku gihugu cyabo.
6. Kunga Abanye-Congo:
Joseph Kabila avuga ko gushaka ubwiyunge hagati y’Abanye-Congo no kongera gukomeza ubumwe bw’igihugu bwangiritse bikwiye kuba mu byihutirwa muri iki gihe.
7. Guteza iterambere igihugu cyose:
Gushyiraho imiyoborere myiza y’ubukungu, imicungire inoze y’ubutegetsi n’imari, no gusaranganya umutungo w’igihugu mu buryo buboneye nabyo biri mubyo Kabila abona ko bikwiye muri iki gihe.
8. Gusubukura ibiganiro n’ibihugu bituranyi:
Ingingo ikomeye asaba ko yubahirizwa ni ugutangiza ibiganiro bivuye ku mutima kandi bihoraho n’ibihugu byose bituranye na Kongo, hagamijwe kubaka amahoro arambye n’iterambere ry’Akarere.
9. Kugarura icyizere amahanga afitiye igihugu:
Kongera kubaka icyizere igihugu gifitiwe n’abafatanyabikorwa bo mu karere, ku mugabane wa Afurika no ku rwego mpuzamahanga biri mubyo uyu mugabo wahoze uyobora DRC asanga byihutirwa.
10. Guhashya imitwe yitwaje intwaro:
Kabila avuga ko guhashya imitwe yose yitwaje intwaro, yaba iy’imbere mu gihugu cyangwa iy’amahanga, ikorera ku butaka bwa Congo, no gusubiza abarwanyi b’abanyamahanga mu bihugu bakomokamo, bikwiye gukorwa vuba.
11. Guhagarika ikoreshwa ry’abacanshuro mu bya gisirikare:
Mu Ijambo rye kandi, yavuze ko bik guca burundu umuco wo kwishingikiriza ku bacanshuro no kubakoresha mu bikorwa bya gisirikare ari ikintu gikwiye kuko bihesha igihugu agaciro.
12. Gutegeka ingabo z’amahanga kuva muri Kongo:
Iyi ngingo, ikaba n’iya nyuma, isaba ubutegetsi bwa Kinshasa gutegeka ingabo zose z’amahanga kuva ku butaka bwa Repubulika Iharanira Demokarasi ya Congo ako kanya.
Ifoto: Joseph Kabila@X/Account
