Abantu nibura 18 bishwe mu Majyepfo ya Libani nyuma y’ibitero byinshi by’indege bya Isirayeli byagabwe mu ijoro ryakeye, nk’uko byatangajwe na Minisiteri y’Ubuzima ya Libani.
Hagati aho, igisirikare cya Isirayeli cyatangaje ko abasirikare bacyo bane na bo bishwe.
Ingabo za Isirayeli (IDF) zavuze ko zagabye ibitero ahantu 80 hafite aho hahuriye na Hezbollah uterwa inkunga na Irani, zikemeza ko zishe abarwanyi benshi bawo.
Ibi bibaye nyuma y’umunsi umwe Leta Zunze Ubumwe za Amerika na Irani basinyanye amasezerano agamije guhagarika amakimbirane yo mu Burasirazuba bwo Hagati, harimo no guhagarika burundu imirwano muri Libani.
Kuva ayo masezerano yatangazwa, Isirayeli na Hezbollah byakomeje kurasana, ibintu byateje impungenge ku hazaza h’agahenge kari hagati ya Amerika na Irani.
Amasezerano ya Amerika na Irani asaba guhagarika imirwano ku mpande zose no kubahiriza ubusugire n’ubwigenge bwa Libani bikozwe na Isiraheli.
Nyamara, Isirayeli yavuze ko nta gahunda ifite yo gukura ingabo zayo muri Libani kandi ishimangira ko intambara yayo na Hezbollah itandukanye n’intambara yari ifitanye na Irani.
Ikigo cya Leta cya Libani gishinzwe amakuru cyatangaje ko ibisasu byarashwe mu karere ka Nabatieh, mu Majyepfo ya Libani, mu ijoro ryo ku wa Kane byari mu bitero bikaze cyane byabaye muri iyi ntambara.
Ngo byahitanye abantu 18, abandi 33 barakomereka, kandi inyubako nyinshi zirasenyuka.
Hezbollah yatangaje ko yateze igico ku ngabo za Isirayeli mu Majyepfo ya Libani, igasenya ibifaru bitatu ikoresheje misile ziyoborerwa kuri mudasobwa ndetse ikatera abasirikare ba Isirayeli ibisasu bya roketi.
Minisitiri w’Intebe wa Isirayeli, Benjamin Netanyahu, yihanganishije imiryango y’abasirikare bane bishwe.
Mu butumwa yanyujije ku rubuga X ku wa Gatanu, yavuze ko yahaye IDF amabwiriza yo “gukubita Hezbollah n’imbaraga zose.”
Yanditse ati: “Amabwiriza yanjye arasobanutse: Isirayeli ntizihanganira ibitero byibasira abasirikare bayo cyangwa ubutaka bwayo, kandi Hezbollah izishyura igiciro gikomeye cyane kuri ibyo bitero.”
Perezida wa Libani, Joseph Aoun, yavuze ko “kwaguka kw’ibitero bya Isirayeli ari ukwongera amakimbirane mu buryo buteye inkeke kandi bukwiriye kwamaganwa,” yongeraho ko ibyo “bitazabuza ibikorwa byo kugera ku gahenge karambye kandi kagutse vuba bishoboka.”
Libani yinjiye muri iyi ntambara hagati ya Isirayeli, Amerika na Irani nyuma gato y’uko itangiye, ubwo Hezbollah yarasaga roketi muri Isirayeli yihorera ku gitero cyari cyahitanye Umuyobozi Mukuru wa Irani.
Mu gusubiza, Isirayeli yatangije ibikorwa bikomeye byo gutera ibisasu muri Libani ndetse ifata hafi 5% by’ubutaka bwo mu majyepfo y’igihugu, igamije gusubiza inyuma abarwanyi ba Hezbollah kure y’umupaka wayo wo mu Majyaruguru.
Nk’uko Minisiteri y’Ubuzima ya Libani ibivuga, abantu nibura 3,912, barimo abagore n’abana, bamaze kwicwa kuva iyi ntambara nshya yatangira, naho abandi 11,699 barakomereka.
Abantu bagera kuri miliyoni imwe baracyari mu buhungiro, mu gihe imiryango myinshi yo mu Majyepfo yasenywe burundu.
Hezbollah yarahiye ko izakomeza ibitero byayo igihe cyose icyo yita igitero cyangwa iyigarurirwa ry’ubutaka bwa Lebani rizaba rigikomeje.
Minisitiri wa Isirayeli ushinzwe Umutekano w’Igihugu, Itamar Ben-Gvir, uzwiho ibitekerezo bikakaye, yavuze ko “Libani yose igomba gushya” nyuma y’urupfu rw’abasirikare bane.
Mu itangazo yashyize ahagaragara yagize ati: “N’ubwo twubaha Abanyamerika, Isirayeli igomba kumenyesha isi yose ko amaraso y’abahungu bacu n’umutekano w’abaturage bacu bitagomba kugirwaho imishyikirano.”
Minisitiri w’Ububanyi n’Amahanga w’Ubufaransa, Jean-Noël Barrot, yavuze ku wa Gatanu ko Isirayeli igomba “kubahiriza” ayo masezerano kandi asaba Amerika gushyira igitutu kuri Guverinoma ya Isirayeli.
Amasezerano ya Amerika na Irani yasinywe ku wa Kane akubiyemo ingingo zirebana na gahunda ya kirimbuzi ya Irani, koroherezwa ibihano, ndetse n’isezerano ry’impande zombi ryo gushaka umuti wa nyuma mu gihe cy’iminsi 60, igihe gishobora kongerwa impande zombi zibyumvikanyeho.
Icyiciro gishya cy’ibiganiro byari biteganyijwe ku wa Gatanu cyarasubitswe nyuma y’uko Visi Perezida wa Amerika, JD Vance, ahagaritse urugendo yari ateganyije kugirira mu Busuwisi kugira ngo yitabire ibyo biganiro.
Mbere yaho, Vance yari yanenze bamwe mu bagize Guverinoma ya Netanyahu kubera uko bakiriye ayo masezerano, ababwira ko bakwiye “gukanguka bakareba ukuri uko kuri.”
Yabwiye abanyamakuru ati: “Iyo mba ndi muri guverinoma ya Isirayeli, sinari kuba ntenguha umufatanyabikorwa rukumbi ukomeye mfite ku isi yose.”
Mu kiganiro yahaye ikinyamakuru New York Times, Vance yavuze ko Ben-Gvir na Minisitiri w’Imari Bezalel Smotrich ari bamwe mu banenga ayo masezerano.
Ati: “Igisubizo nabaha ni iki: umugambi wanyu nyakuri ni uwuhe? Muri igihugu gifite abaturage miliyoni icyenda. Ntimushobora gukemura buri kibazo cy’umutekano mufite mukoresheje kwica gusa.”
Ku wa Kane, Netanyahu na we yashimangiye akamaro ko gukomeza umubano wa hafi hagati ya Isirayeli na Amerika, avuga ko Washington yari yarahagaze “urutugu ku rundi” na Isirayeli mu ntambara yayo na Irani.
Ariko uwo mubano umaze iminsi urimo agatotsi, nyuma y’amakuru yasohotse avuga ko Donald Trump yagiye agaragaza kutishimira imyitwarire ya Netanyahu mu biganiro bya telefoni bagiranye inshuro nyinshi.
Abayobozi ba Amerika bari baratangaje mbere ko, n’ubwo Libani iri mu rwego rw’agahenge kateganyijwe n’amasezerano, gukura ingabo za Isirayeli ku butaka bwa Libani atari kimwe mu bisabwa n’ayo masezerano, kandi ko Isirayeli izakomeza kugira uburenganzira bwo kwirwanaho.
