Menu
Indimi

Politiki

Minisitiri w’Intebe wa Ethiopia Yatanze Inshingano Ajya Ku Rugamba

Yanditswe kuwa

Minisitiri w’Intebe wa Ethiopia Dr Abiy Ahmed yasigiye inshingano Demeke Mekonnen Hassen umwungirije, ajya ku rugamba guhangana n’umutwe wa TPLF usumbirije umurwa mukuru.

Ni icyemezo yafashe mu gihe abarwanyi bageze mu bilometero 200 uvuye mu murwa mukuru Addis Ababa.

Guverinoma ya Ethiopia magingo aya irimo kwinjiza abasirikare bashya ku bwinshi, bagahabwa imyitozo y’ibanze mbere yo koherezwa ku rugamba. Mu bemeye guhita binjira mu gisirikare harimo Haile Gebreselassie na Feyisa Lilesa bafite imidali ya zahabu mu gusiganwa ku maguru.

Reuters yanditse ko Minisitiri w’Intebe wungirije Demeke Mekonnen Hassen ari we wasigaranye inshingano zo guhuza ibikorwa bya Guverinoma.

Umuvugizi wa Guverinoma, Legesse Tulu, yemeje mu kiganiro n’abanyamakuru kuri uyu wa Gatatu ko Minisitiri w’Intebe Abiy yageze ku rugamba ku wa Kabiri.

Demeke wasigaranye inshingano asanzwe ari na Minisitiri w’Ububanyi n’amahanga.

Ku wa Mbere nibwo Abiy yatangaje ko ashaka kujya kuyobora urugamba ubwe, agahangana n’inyeshyamba za TPLF n’abarwanyi bishyize hamwe na zo.

Ni nyuma y’uko mu kwezi gushize zavuze ko zishaka gufata umurwa mukuru, ndetse urugamba rugeze kure.

Mu ijoro ryo ku wa Kabiri imirwano ikaze yabereye mu bice byo hafi ya Debre Sina, ni muri kilometero 190 i Addis Ababa.

Bibarwa ko ari agace kugasohokamo byakoroshya urugamba ku nyeshyamba, kuko zaba zigeze mu mirambi irushaho gusatira umurwa mukuru.

Bisa n’aho urugamba rukomeje kugorana ku ngabo za leta, bijyanye n’uko abarwanyi benshi bari bakomeye muri Ethiopia barimo kurwana ku ruhande rwa TPLF, mu gihe aribo batumaga ingabo z’iki gihugu zikomera.

Hagati aho ibihugu byinshi ndetse n’Umuryango w’Abibumbye birimo gucyura bwangu abadipolomate babyo. Hari ubwoba ko mu minsi mike iri imbere ibintu byaba bibi kurushaho.

Ntabwo biremezwa aho Abiy arimo kuyoborera urugamba, niba ari aho imirwano ibera koko cyangwa ahandi hatekanye, hanze y’umurwa mukuru.

Nta foto ye ari ku rugamba irajya hanze.

Undi waherukaga gukora nk’ibyo yari Marechal Idris Deby Itno wahoze ayobora Tchad, wiciwe ku rugamba.

Dr Abiy yabaye umusirikare mukuru mu ngabo Ethiopia mu 1991–2010 avamo afite ipeti rya Lieutenant Colonel.

Tanga igitekerezo

Tanga igitekerezo

Your email address will not be published. Required fields are marked *

Advertisement

English Version

Advertisement
WeCreativez WhatsApp Support
Mutwandikire turabasubiza
Twandikire