Arsenal yegukanye Premier League nyuma y’imyaka irenga 20 itagikoraho. Umwe mu bafana bayo bakomeye ku isi, Perezida Paul Kagame yayishimiye iyi ntsinzi, yandika kuri X ko yari ibikwiye rwose.
Yanditse ati: “ Tubashimiye intsinzi yanyu Arsenal, umufatanyabikorwa wacu muri Visit Rwanda. Kuba mutwaye Premier League, ni ikintu mwari mukwiye, mwaharaniye koko.”
Arsenal yegukanye igikombe cya Shampiyona y’u Bwongereza nyuma y’imyaka 22 itagitwara.
Intsinzi yayo ije nyuma y’uko Manchester City inganyije igitego 1-1 na AFC Bournemouth.
Uretse umuhati yagaragaje muri uyu mwaka w’imikino wa 2025/2026, Arsenal yagize n’amahirwe y’uko hari ikipe yitwaye nabi bituma ibona andi y’inyongera ayigeza ku gikombe, ari yo kwitwara nabi kwa Manchester City.
Mu ijoro ryo kuri uyu wa Kabiri tariki 19, Gicurasi(5) 2026 nibwo abakinnyi batozwa na Pep Guardiola banganyije na AFC Bournemouth igitego 1-1 biba bihaye Arsenal intsinzi bityo.
Arsenal yayegukanye ifite amanota 82 mu gihe Man City yo yagize amanota 77 kandi habura umukino umwe.
Bivuze ko mu mukino utaha ari nawo wa nyuma, niyo Arsenal yawutsindwa yagumana amanota 82 mu gihe Man City yo niyo yawutsinda yakuzuza 80 ikaguma ku mwanya wa kabiri.
