Ibiro bya Perezida wa Mozambique byatangaje ko Perezida Filipe Nyusi n’umugore we Isaura Nyusi bombi banduye icyorezo COVID-19.
Byasohotse mu itangazo biriya biro byasohoye mu ijoro ryacyeye.
Icyakora Perezida Nyusi na madamu we nta bimenyetso bya COVID-19 bari kwerekana, ubu bakaba bishyize mu kato kugira ngo batagira undi banduza.
Itangazo ryo mu Biro by’Umukuru w’Igihugu cya Mozambique bivuga ko Perezida Nyusi na Madamu we bahisemo kujya mu kato birinda ko bagira uruhare urwo ari rwo rwose mu kwanduza abaturage.
Ririya tangazo rivuga ko Perezida Nyusi ashobora kuba yaranduriye mu Nama nyinshi amaze iminsi ajyamo, zaba izo ku rwego rw’igihugu cye ndetse n’izo ku rwego mpuzamahanga.
Ni inama yitabiriye cyane cyane mu mpera z’umwaka wa 2021.
Inzego z’ubuzima muri kiriya gihugu zivuga ko abantu benshi banduye COVID-19 baganjemo abanduye ubwandu bwayo bushya buri hirya no hino ku isi bwiswe Omicron.
Umunyamakuru w’Ikinyamakuru cyo mu Bushinwa ukorera muri Mozambique kitwa China Daily avuga ko mu masaha 24 ashize, abantu 12 bahitanywe na kiriya cyorezo.
Kuva cyahaduka muri Mozambique kimaze kwica abantu 2,031.
