Dukuzumuremyi Anne Marie ushinzwe imibereho myiza y’abaturage mu Karere ka Rusizi ashima ko ubu imirenge yose y’aka Karere ifite ikigo nderabuzima ndetse n’utugari bikaba uko.
Umurenge wa Gihundwe niwo utagiraga ikigo nderabuzima kiza kubakwa mu Kagari ka Shagasha ariko ubu cyarubatswe ngo gihe serivisi z’ubuvuzi abakigana.
Visi Meya w’Akarere ka Rusizi ushinzwe imibereho myiza y’abaturage avuga ko kuba Shagasha itari ifite ikigo nderabuzima kandi ahandi bihari, byatewe ni uko nta bushobozi bwo kubyubakira icyari rimwe bwari buhari.
Mu kubikemura, bagiranye ubufatanye n’Ikigo cya Ababiligi gishinzwe iterambere mpuzamahanga Enabel.
Uyu muyobozi avuga hari n’ahandi bafashije ababyeyi kubona aho basuzumisha bitabaye ngombwa ko bajya ku bitaro bikuru.
Marie Nyirangirumpatse uyobora iki kigo, avuga ko abatuye Akagari ka Shagasha mu Murenge wa Gihundwe biruhukije bamaze kubona aho bazajya bivuriza.
Ati: “Ubu dufite ikigo nderabuzima gitangirwamo serivisi nk’iz’ahandi mu bigo nderabuzima kandi abaturage baza hano bagahabwa serivisi z’ubuvuzi ku rwego rwiza.”
Ashima ko Enabel yabafashije kubona kiriya kigo nderabuzima ariko agasaba ko ubuyobozi bw’Akarere ka Rusizi bwazabafasha kubona umuhanda mwiza uborohereza kugera ku kigo bivurizaho.
Visi Meya w’Akarere ka Rusizi ushinzwe imibereho myiza y’abaturage avuga ko hari gahunda yo kuzakora umuhanda ugera kuri icyo kigo ariko biri mu mezi menshi ari imbere.
Guverinoma y’u Rwanda isanganywe gahunda y’uko muri Murenge haba Ikigo nderabuzima, bikazagera no mu Tugari twose
Ibigo nderabuzima bifasha abaturage kubona serivisi z’ubuvuzi z’ibanze zibafasha kwivuza bitabaye ngombwa ko bajya ku bitaro bikuru.
Ikigo cy’Ababiligi gishinzwe iterambere mpuzamahanga Enabel gikorana n’uturere turindwi muri gahunda y’ubuvuzi harimo gufasha ababyeyi n’abana kubona serivisi nziza z’ubuvuzi.
Enabel imaze imyaka 20 ikorera hirya no hino muri Aziya no muri Afurika.
Ikorera mu nzego z’ubuvuzi, uburezi, kurengera ibidukikije, ubuhinzi, ikoranabuhanga, guteza imbere umurimo no gufatanya mu byo kubaka umutekano.
Aho hose ku isi Enabel ikorana n’imishinga 170 mu bihugu 20 kandi ikoresha abantu 2,100.
