Minisitiri wa Siporo, Munyangaju Aurore Mimosa, yatangaje ko mu byumweru bitarenze bitatu shampiyona y’umupira w’amaguru izasubukurwa, nyuma y’igihe ihagaritswe mu gukumira ikwirakwira ry’icyorezo cya COVID-19.
Shampiyona yahagaritswe ku wa 12 Ukuboza 2020, hashingiwe ku bugenzuzi bwagaragaje ko hari aho abakinnyi bari bacumbitse mu mwiherero w’amakipe yabo, bagasohoka cyangwa bagasurwa uko bashatse, kandi amabwiriza yo kwirinda abibuza.
Ibyo byahujwe n’uburyo ibipimo byari bikomeje gufatwa mu makipe kuva ubwo shampiyona yatangiraga mu Ukuboza 2020, byari bikomeje kugaragaza ubwandu bwa COVID-19.
Mu kiganiro kuri televiziyo y’igihugu kuri uyu wa Gatatu, Minisitiri Munyangaju yavuze ko bamaze iminsi baganira n’amashyirahamwe y’imikino ku buryo bwo kwirinda COVID-19, mu gihe imikino yaba isubukuwe.
Ati “Birashoboka ko no mu byumweru bibiri cyangwa bitatu, shampiyona [y’umupira w’amaguru] ishobora kongera igasubukurwa. Ariko noneho icyiza, batugaragarije icyizere ko noneho niyongera gusubukurwa, ibyabaye bitazongera.”
Yavuze ko igisigaye ari ukunoza gahunda y’imikino ku rwego rwa minisiteri ya siporo, igashyikirizwa inzego zishinzwe kurwanya icyorezo cya COVID-19, mbere y’uko hatangwa uburenganzira bwa nyuma bwo gusubukura imikino.
Perezida w’Ishyirahamwe ry’Umupira w’Amaguru mu Rwanda, FERWAFA, Sekamana Jean Damascène, yavuze ko nihemezwa igihe imikino izasubukurirwa, hazanozwa uko amakipe azahura, bijyanye n’indangaminsi mpuzamahanga y’umupira w’amaguru.
Ati “Abatekinisiye bacu bariteguye, ni ukuvuga ngo barabara iminsi.”
Yavuze ko amakipe yafashe ingamba zikomeye, kuko ari yo yatumye shampiyona isubikwa kubera kutubahiriza amabwiriza yashyizweho yo kwirinda COVID-19.
Shampiyona yahagaritswe nyuma y’uko Rayon Sports yari imaze kugaragaramo abakinnyi 12 banduye COVID-19, ikajya mu kato kimwe na Rutsiro FC zahuye ku munsi wa mbere wa Shampiyona.
Mu Ugushyingo 2020 nabwo Komite Nyobozi ya FERWAFA yahanishije AMAGAJU FC kuvanwa mu irushanwa rya Playoffs ryo gushaka ikipe yari kuzamuka mu cyiciro cya mbere, nyuma yo guhamwa n’uburangare bwatumye abakinnyi 11 bayo bandura COVID-19.
Icyo gihe byatangajwe ko hari umukinnyi witwa Murindwa Evariste wageze mu mwiherero w’ikipe nyuma y’abandi, ahura n’abakinnyi ibisubizo by’ibipimo bye bya COVID-19 bitarasohoka, biza kugaragara ko yanduye, yanduza abandi.
