Leta ya Tanzania kuri uyu wa Gatandatu yakiriye inkingo 1,058,400 za COVID-19 zo mu bwoko bwa Johnson & Johnson, zizahabwa abaturage bangana n’uwo mubare kuko uru rukingo ruterwa umuntu inshuro imwe.
Ni inkingo zatanzwe na Leta zunze ubumwe za Amerika binyuze muri gahunda mpuzamahanga yo gufasha ibihugu kubona inkingo za COVID-19, COVAX.
Minisitiri w’Ubuzima wa Tanzania Dr. Dorothy Gwajima yatangaje ko abantu bagomba gukingirwa ku ikubitiro ari abakora mu nzego z’ubuzima, abasanganywe indwara zikomeye ndetse n’abakuze barengeje imyaka 50.
Gukingira bizahera mu bice bya Dar es Salaam, Mwanza, Kilimanjaro, Mbeya, Arusha, Kigoma, Singida, Dodoma, Iringa na Mtwara.
Yagize ati “Ndashishikariza abantu bari muri ibyo byiciro kuza kwikingiza COVID-19, kuko kwikingiza bizadufasha kugabanya ubukana bw’icyorezo bushobora kwiyongera igihe icyo aricyo cyose.”
Minisitiri Gwajima yijeje ko inkingo zizewe kuko zahawe icyemezo mpuzamahanga.
Iyo gahunda itangijwe nyuma y’uko muri iki cyumweru Tanzania yahagaritse ibikorwa bitari ngombwa bihuza abantu benshi.
Minisitiri Dr Gwajima aheruka kuvuga ko Tanzania yiyemeje gukingira 60 % by’abaturage bayo bose.
Muri iyo gahunda igihugu kizakoresha miliyoni nibura $470 mu kugura inkingo.
Ni umurongo igihugu cyafashe ku bwa Perezida Samia Suluhu, mu gihe ku bwa Dr Pombe Magufuli wamubanjirije kitakozwaga ibijyanye no kwirinda cyangwa gukingira COVID-19, kuko imirimo yose, ibitaramo n’imikino byakomeje nta nkomyi.
Tanzania yari yarahagaritse no gutangaza imibare igaragaza abanduye COVID-19, ariko nabyo biheruka gusubukurwa.
Kuri uyu wa Gatandatu yatangaje ko abantu banduye COVID-19 ari 176 mu gihe yishe 29. Byatumye umubare w’abarwayi bamaze kubarurwa mu gihugu uba 858.
Minisitiri w’Intebe wa Tanzania, Kassim Majaliwa, aheruka kuvuga ko iki gihugu atari akarwa, ku buryo kudakingira abaturage byatuma abapfa bakomeza kuba benshi, ndetse bikazagira ingaruka zikomeye ku bakenera kujya mu mahanga mu mirimo itandukanye cyangwa ingendo nyobokamana.
