U Rwanda rugiye kwakira inkingo hafi ibihumbi 300 z’icyorezo cya Covid-19 za AstraZeneca, byitezwe ko zizahita zihabwa abazigenewe mu maguru mashya.
Izo nkingo ziragera ku kibuga mpuzamahanga cy’indege cya Kigali mu gitondo cyo kuri uyu wa Gatatu. Ni igice kimwe cy’inkingo zabonetse binyuze muri gahunda yagenewe gufasha ibihugu bikennye kubona inkingo za COVID-19, izwi nka COVAX.
Binyuze muri iyo gahunda irangajwe imbere n’Ishami ry’Umuryango w’Abibumbye ryita ku buzima (WHO), ihuriro Gavi n’abandi bafatanyabikorwa, kuri iyi nshuro habonetse inkingo miliyoni 237 za AstraZeneca /Oxford zakozwe n’ikigo Serum Institute of India, zigomba gusaranganywa ibihugu 142.
Biteganywa ko hagati ya Gashyantare na Gicurasi 2021 u Rwanda ruzahabwa inkingo 744.000 za AstraZeneca na 102.960 za Pfizer/BioNTech.
Bijyanye n’uburyo urukingo ruzakirwa kuri uyu wa Gatatu umuntu agomba kuruterwa inshuro ebyiri, bivuze ko izizakirwa zishobora gukingira abantu bagera mu bihumbi 150, bakingiwe bya burundu.
Taarifa yamenye ko gutanga izi nkingo ku mugaragaro bizatangira ku wa Gatanu.
Minisitiri w’Ubuzima Dr Ngamije Daniel aheruka kuvuga ko leta yihaye intego yo gukingira Abanyarwanda 20%, ariko harimo gushakirwa ubundi bushobozi ku buryo hazakingirwa 60%, harimo abakora kwa muganga, abashinzwe umutekano, abakorera ahantu hari ubucucike, inkambi z’impunzi, abacuruzi n’abandi.
Kuri uyu wa Kabiri hari ibindi bihugu byahawe inkingo birimo Angola yashyikirijwe 624.000 za AstraZeneca na Nigeria yashyikirijwe inkingo miliyoni 3.94.
Ku wa Mbere Ghana yabimburiye ibindi bihugu bya Afurika gukingira COVID-19, nyuma yo kwakira inking 600.000 binyuze muri gahunda ya COVAX.
