Minisitiri w’imari n’igenamigambi Dr. Uzziel Ndagijimana yabwiye Inteko ishinga amategeko y’u Rwanda ko bifuza ko ingengo y’imari yari yatowe n’Abadepite ingana na miliyari Frw 4,658.4 , yongerwa ikaba miliyari Frw 4,764.8.
Ni inyongera ingana 2,4%, aya akaba angana na Miliyari 106,4.
Ku mpinduka ku mafaranga yinjizwa mu ngengo y’imari ya Leta, abakozi muri Minisiteri y’imari n’igenamigambi bayobowe na Dr. Ndagijimana bavuze ko amafaranga ava imbere mu gihugu aziyongera ave kuri miliyari Frw 2,372.4 agere kuri miliyari Frw 2,487.6, akiyongeraho miliyari 115.2 bingana na 5%.
Minisiteri y’imari n’igenamigambi ivuga ko kwiyongera kwatewe ahanini n’ukwiyongera kw’amafaranga aturuka ku misoro n’amahoro bijyanye no gukomeza kuzahuka kw’ibikorwa by’ubukungu n’ubucuruzi.
Ikindi kandi amafaranga aturuka ku misoro aziyongera ave kuri miliyari Frw 2,067.7 yari ateganyijwe mu ngengo y’imari yatowe agere kuri miliyari Frw 2,180.9, ni ukuvuga inyongera ya miliyari Frw 113.2 ingana na 5.5%.
Dr. Uzziel Ndagijimana avuga ko amafaranga atari imosoro aziyongera ave kuri miliyari Frw 304.6 agere kuri miliyari Frw 306.7, ni ukuvuga ko inyongera ya miliyari Frw 2 ingana na 0.7%.
Ku bijyanye n’uburyo amafaranga y’ingengo y’imari ateganyijwe gukoreshwa, ingengo y’imari iziyongera ive kuri miliyari Frw 4,658.4 igere kuri miliyari Frw 4,764.8 z’amafaranga y’u Rwanda, bivuze ko iziyongeraho agera kuri miliyari Frw 106.4.
Ingengo y’imari isanzwe iziyongera ive kuri miliyari Frw 2,543.2 igere kuri miliyari Frw 2,705.2, bivuze ko iziyongeraho agera kuri miliyari Frw 162.
Akamaro k’iyo nyongera ni uko ariya mafaranga azafasha muri gahunda zitandukanye zirimo kongera imishahara y’abarimu, gushyira mu myanya abarimu bashya, ifumbire igenewe kuzamura umusaruro wa kawa no kuziba ibindi byuho byagaragaye mu nzego za Leta zitandukanye.
