U Rwanda Rwinjije Miliyari Zisaga 160 Frw Mu Bikomoka Ku Buhinzi Byoherejwe Mu Mahanga - Taarifa
Menu
Indimi

Ubukungu

U Rwanda Rwinjije Miliyari Zisaga 160 Frw Mu Bikomoka Ku Buhinzi Byoherejwe Mu Mahanga

Yanditswe kuwa

Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi (NAEB)  cyatangaje ko mu gihembwe cya kabiri cy’uyu mwaka w’ingengo y’imari wa 2021/2022, u Rwanda rwinjije 158,538,598$ mu musaruro wacurujwe ku isoko mpuzamahanga.

Kuri uyu wa Kabiri nibwo NAEB yatangaje raporo igaragaza ingano y’umusaruro woherejwe mu mahanga n’inyungu yavuyemo mu mezi y’Ukwakira, Ugushyingo n’Ukuboza 2021.

Izi 158,538,598$ zingana na miliyari zisaga 160 Frw zihwanye n’izamuka rya 39% ugereranyije n’igihembwe cya kabiri cy’umwaka w’ingengo y’imari ya 2020/2021, aho u Rwanda rwinjije miliyoni 114,054,060$.

Inyungu y’ibihingwa birimo ikawa, icyayi n’ibireti yazamutseho 36% igera kuri 63,756,967$, ivuye kuri 46,851,502$ yinjiye mu mwaka w’ingengo y’imari ya 2020/2021.

Ni mu gihe ibindi bihingwa bisigaye amafaranga byinjije yazamutseho 41% akagera kuri 94,781,631$, avuye kuri 67,202,558$ yinjiye mu mwaka wabanje.

NAEB yakomeje iti “Izamuka ry’ibikomoka ku buhinzi byoherezwa mu mahanga ni umusaruro w’imbaraga Guverinoma y’u Rwanda yashyize mu gukumira ingaruka z’icyorezo cya COVID-19 cyahungabanyije ibikorwa by’ubucuruzi harimo n’urwego rw’ibyoherezwa mu mahanga, isubukurwa ry’urujya n’uruza rw’abantu no kuba ubukenerwe ry’ibi bihingwa mu mahanga bukomeje kwiyongera.”

Inyungu yavuye mu cyayi cyoherejwe mu mahanga yazamutseho 25.5% igera kuri 23,671,779$, ivuye kuri 18,853,622$ yabonetse mu gihembwe cya kabiri mu mwaka wabanje.

NAEB yatangaje ko izamuka ry’amafaranga yinjiye ryashingiye ahanini ku izamuka ry’ingano y’icyayi cyoherejwe mu mahanga cyazamutseho 6.9%, kikagera kuri toni 7,634, zivuye kuri toni 7,140.9 mu mwaka wa 2020/2021.

Igiciro fatizo ku isoko mpuzamahanga nacyo cyarazamutse kigera ku madolari 3.10 ya Amerika ku kilo, kivuye ku madolari 2.65/kg mu mwaka wabanje.

Ku bijyanye n’Ikawa, inyungu yageze ku madolari ya Amerika 38,427,853 ivuye ku 26,111,829$ yabonetse mu gihembwe cya kabiri cy’umwaka wa 2020/2021.

Bihwanye n’izamuka rya 47%, ryashingiye ahanini ku giciro cyiza ikawa y’u Rwanda yaguzweho ku isoko mpuzamahanga.

Icyo giciro cyageze ku madolari 4.9/Kg kivuye ku madolari 3.7/Kg mu gihembwe cya kabiri mu mwaka wa 2020/2021.

Ibyo kandi bijyana n’uko ingano y’ikawa yoherejwe mu mahanga yazamutseho 15.5% ugereranyije ibihembwe bya kabiri by’imyaka ya 2020/2021 na 2021/2022.

Mu bindi bihingwa, inyungu yavuye mu bijyanye n’imboga zoherejwe mu mahanga yazamutseho 3.3%, mu mbuto izamukaho 34.6% naho mu ndabo izamuka 48.8%.

Tanga igitekerezo

Tanga igitekerezo

Your email address will not be published.

Advertisement

English Version

Advertisement
Advertisement Enter ad code here