Polisi y’u Rwanda yafashe abantu 88 bari batashye ubukwe, bazira ko barenze ku mabwiriza yo kwirinda COVID-19. Uretse abageni, abandi bose ntabwo bari bipimishije iki cyorezo nk’uko amabwiriza abiteganya.
Bafashwe mu gihe kudohoka ku mabwiriza yo kwirinda COVID-19 bikomeje gushyirwa ku isonga mu gutuma habaho ubwiyongere bukabije bw’ubwandu bushya bwa COVID-19.
Bafatiwe i Nyamirambo mu Karere ka Nyarugenge, mu busitani buzwi nka Green Mountain Biking Garden. Bafashwe ku gicamunsi, bicaye banegeranye cyane.
Amakuru Taarifa yamenye ni uko “Uretse umukwe n’umugeni, abandi batari bipimishije COVID-19 nk’uko biteganywa mbere yo kwitabira ibirori nk’ibi. Ibyo bikiyongeraho ko batari bahanye intera nk’uko biteganywa n’amabwiriza yo kwirinda ikwirakwira rya COVID-19.”
Ni mu gihe inama y’abaminisitiri iheruka kwemeza ko guhera ku wa 14 Kamena, ibikorwa byose bihuriza abantu muri hoteli, mu busitani cyangwa ahandi hashobora kubera amakoraniro mu buryo bwa rusange, bitagomba kurenza 30% by’ubushobozi bwo kwakira abantu bw’aho bateraniye.
Yakomeje iti “Abitabiriye icyo gikorwa bagomba kuba bafite icyemezo cy’uko bipimishije COVID-19 iminsi 3 mbere y’uko icyo gikorwa kiba.”
Bariya bantu uko ari 88 bahise bajyanwa muri Stade ya Kigali i Nyamirambo barigishwa, banacibwa amande.
Mu mabwiriza aheruka gusohorwa, ubusabane n’ibirori bitandukanye bibera mu ngo byo birabujijwe.
