Ubundi Bwoko Butatu Bw’Ubuki Bwakuwe ku Isoko

Ikigo Gishinzwe Ibiribwa n’Imiti (Rwanda FDA) cyatangaje ko cyakuye ku isoko ubundi bwoko butatu bw’ubuki, nyuma yo gusanga bwarahinduriwe umwimerere.

Ubwo buki ni Best Honey, Honey Power of Nature na Miel de Nyungwe.

Rwanda FDA yatangaje ko iki cyemezo cyafashwe hashingiwe ku itegeko ribuza guhundura umwimerere w’ubuki bupfunyitse n’ubugenzuzi bwakozwe nyuma yo kwakira ibibazo by’abaguzi bavuga ko hari ubuki baguze butujuje ubuziranenge.

Umuyobozi Mukuru wa Rwanda FDA Dr Charles Karangwa yakomeje avuga ko hanashingiwe ku bisubizo bya laboratwari byagaragaje ko ubuki bwa Best Honey, Honey Power of Nature na Miel de Nyungwe bwahinduriwe umwimerere.

Abatunganya ubwo buki ngo ntabwo baramenyekana, ahubwo bwitirirwa uruganda Nyungwe Forest rwanditseho ko rukora Best Honey mu gihe ubundi nta nganda zibutunganya zanditseho.

Yakomeje ati “Rwanda FDA iramenyesha abaturarwanda bose ko ikuye ku isoko ubu buki bwa Best Honey, Honey Power of Nature na Miel de Nyungwe.”

Yasabye abafite ubwo buki bose mu maguriro kubusubiza aho baburanguye bitarenze iminsi itanu y’akazi, ndetse ababuranguje bategekwa kubwakira ndetse bakazabitangira raporo muri Rwanda FDA.

Rwanda FDA iheruka gutangaza ko mu bugenzuzi bwakozwe ku bwoko 23 bw’ubuki, bamaze kubonamo 5 butujuje ubuziranenge. Iheruka gukura ku isoko ubundi bwoko bw’ubuki bwa HONEY HIVE.

Kugeza ubu ubuki bumaze kwandikishwa no kugenzurwa ko bwujuje ubuziranenge ni Uburanga Honey, Aux Delices, Ishema Rwanda Natural Honey Forest, MP Honey, BB & Daughters Honey, ABDC Honey na Gishwati Natural Honey.