MTN Rwanda yamuritse uburyo yise ‘MTN Anti-DDoS Solution’ bwo gufasha ibigo n’inzego gukumira ibitero by’ikoranabuhanga biba bigamije kubyiba.

Akenshi banki, ibigo by’ubwishingizi, iby’itumanaho n’ibindi bibika amakuru akomeye n’amafaranga menshi nibyo byibasirwa n’ibyo bitero biba byateguwe n’abaminuje mu ikoranabuhanga babikorera mu ibanga.

Mu kumurika iri koranabuhanga, MTN Rwanda yari yatumiye n’Urwego rw’Igihugu rushinzwe Umutekano w’Ibijyanye n’Ikoranabuhanga mu Itangazabumenyi n’Itumanaho, NCSA.

Umuyobozi wayo, Ali Monzer avuga ko barikoze ngo batahure kandi bakumire ibitero by’ikoranabuhanga biba bigamije gucucura abakiliya b’ikigo ashinzwe.

Ati: “Twiyemeje ko urwego rw’imari rukomeza gukora neza nta bibazo by’ikoranabuhanga byangiza sisitemu z’imikorere zabyo bihari .”

Kanamugire David uyobora Urwego rw’Igihugu rushinzwe Umutekano w’Ikoranabuhanga mu Itangazabumenyi n’Itumanaho avuga ko hari uburyo bwinshi bwo gukumira ibi bitero ariko kumenya uburyo bwizewe kurusha ubundi bikaba ari byo bigorana hagati aho.

Ati: “Nyuma y’uko mutangiye kubona abakiliya benshi no kugira amafaranga menshi, ubucuruzi bugenda neza, icyo gihe  ikintu cya mbere muba mukwiriye gukora ni ukurinda sisitemu z’ikoranabuhanga z’ikigo kugira ngo abakiliya bakomeze kubizera.”

Ibi kandi ni ngombwa cyane ku Rwanda kuko rwitangiye kandi rugikomeje guteza imbere urwego rw’imari rwifashisha ikoranabuhanga mu guhererekanya amakuru n’amafaranga.

Ni ibitero bidatinya na Banki Nkuru y’u Rwanda…

Bertrand Ndengeyingoma uyobora ishami ry’ikoranabuhanga muri Banki nkuru y’igihugu  aherutse kuvuga ko abakozi akorana nabo bahora bacunganwa n’uko abagizi ba nabi batayiba cyangwa bakivanga mu mikorere yayo.

Ubusanzwe, Banki nkuru y’u Rwanda ifite inshingano yo gushyiraho politiki z’ifaranga no gucunga ubuzima bwaryo.

Ndengeyingoma yavugiye mu kiganiro Banki nkuru y’u Rwanda icisha kuri YouTube kitwa NBR Podcast uko inshingano zabo kuri iri iyi ngingo ziba ziteye.

Ati: “Duhora tureba kandi tugerageza ikoranabuhanga rishya kugira ngo dufashe banki kugera ku nshingano zayo mu buryo bwihuse, butanga serivisi nziza kandi ku gihe. Noneho kubera ko iyi ari Banki Nkuru y’u Rwanda bityo imiterere y’akazi dukora idusaba kwitonda cyane kugira ngo habeho politiki n’amategeko asobanutse kuri iryo koranabuhanga rishya mbere y’uko tubishyira mu bikorwa.”

Muri iki gihe ngo ibitero byinshi by’ikoranabuhanga ntibigisaba guca muri sisitemu z’imari ahubwo byibasira abantu ku giti cyabo, hakoreshejwe ubutumwa cyangwa imiyoboro ifite intego yo kwiba amakuru.

Ati “Ibitero byinshi muri iki gihe tubona ni ibitero byo kwiba amakuru, ubujura bwo kuri interineti, uburiganya bugamije kwibasira abantu aho kwibasira sisitemu.”

Ibi abihuriraho na Patience Mutesi uyobora BPR nawe uherutse kubwira Sanny Ntayombya ukorera ibiganiro kuri YouTube ko kimwe mu bimubuza kongera gufata agatotsi iyo yicuye ari umutekano w’amafaranga y’abandi Banki ayobora ibitse.

Yabwiye Ntayombya ati: “ Ntawe umenya igihe igitero cy’ikoranabuhanga kizazira. Kuko 90% by’amafaranga yacu aba ari imyenda, bituma iki kintu kimbuza ibitotsi. Igikomeye kurushaho ni abakozi n’abakiliya muri rusange kuko ikintu cyerekeye urwego rw’imari mu Rwanda ntikirakura cyane.”

MTN Rwanda yemeza ko ibyo buriya buryo bw’ikoranabuhanga buzakora by’ibanze ari ugukumira ko abantu bakwibwa amafaranga yabo.

Kanda hano usome uko iryo koranabuhanga rikora: