Umugore wa Kizza Besigye witwa Winny Byanyima asaba amahanga gukomeza gushyira igitutu ku butegetsi bwa Perezida Yoweri Museveni kugira ngo arekure umugabo we uherutse kuvanwa muri Kenya akaba ari kuburanishirizwa mu nkiko za gisirikare muri Uganda.
Byanyima avuga ko ubutegetsi bwa Museveni bwanize ubwisanzure muri Uganda mu gihe kirekire.
Avuga ko umugabo we yatotejwe mu myaka 25 ishize kandi ngo ni ikintu bigaragara ko atari hafi guhagarika.
Madamu Byanyima asanzwe ayobora ishami ry’Umuryango w’abibumbye rishinzwe rishinzwe kurwanya SIDA ryitwa UNAIDS.
Besigye aherutse gufatirwa i Nairobi, azanwa muri Uganda.
Ni igikorwa ubutegetsi bw’i Kampala buvuga ko bwafashijwemo n’ubw’i Nairobi.
Si Byanyima usaba ko Kizza Besigye arekurwa, ahubwo na sosiyete sivile muri Uganda irabisanga ndetse igasaba ko na Kenya isobanura uko yafashije Uganda kubona no gufunga uriya munyapolitiki utavuga rumwe na Leta ya Kampala.
Uyu mugabo wahoze ari Colonel mu ngabo za Uganda akaba na muganga wavuraga Museveni mu bihe by’intambara yamugejeje ku butegetsi, ari kuburanishwa n’inkiko za gisirikare.
Mu rukiko yavuze ko azaburanirwa n’abanyamategeko yihitiyemo.
Yavuze kandi ko atari akwiye kuburanishirizwa mu nkiko za gisirikare kuko yakivuyemo.
Kizza Besigye yabaye umunyapolitiki utavuga rumwe n’ubutegetsi bwa Museveni mu gihe kirekire.
Yiyamamarije kuyobora Uganda inshuro enye ariko aratsindwa.
