Kuri uyu wa Mbere muri Uganda hatangiye Inama ya 12 ya Komisiyo Ihoraho ihuriweho n’u Uganda n’u Rwanda (Joint Permanent Commission – JPC) iganirirwamo uko umubano w’ibihugu byombi washimangirwa mu ngeri nyinshi.
Ni inama ibera muri Mestil Hotel i Kampala.
Kuri X, Minisiteri y’ububanyi n’amahanga ya Uganda yanditse ko itsinda rya Uganda riyobowe na Amb. Richard Kabonero, umuyobozi ushinzwe ibibera mu Karere ka Afurika y’Uburasirazuba muri Minisiteri y’Ububanyi n’Amahanga, akaba ari na we wakiriye itsinda ry’u Rwanda riyobowe na Madamu Teta Gisa, Umuyobozi Mukuru w’Ishami rya Afurika muri MINAFFET.
Iyi Komisiyo (JPC) ishimangira ubushake bw’ibihugu byombi bwo kurushaho kunoza ubufatanye mu nzego zitandukanye zirimo umutekano, ubucuruzi, ibikorwa remezo, abinjira n’abasohoka no guteza imbere ubushobozi bw’abaturage (human capital), hagamijwe inyungu z’ibihugu byombi.
Ni urubuga rugamije gusuzuma aho ubufatanye bugeze, gukemura ibibazo bishobora kuvuka hagati y’ibihugu byombi, no gutegura imishinga mishya y’iterambere.
Ubusanzwe, izi nama zibera mu byiciro bitandukanye birimo inama z’abatekinisiye, abayobozi bakuru, n’iz’abaminisitiri, mbere yo gufata imyanzuro ya nyuma.
Ubufatanye hagati y’u Rwanda na Uganda bufite akamaro kanini cyane cyane mu bucuruzi bwambukiranya imipaka, aho ibihugu byombi bisangiye imipaka ifasha urujya n’uruza rw’abantu n’ibicuruzwa.
Hari kandi n’uruhare runini mu bufatanye mu muryango wa Afurika y’Iburasirazuba (EAC) mu guteza imbere iterambere ry’aka Karere.
Mu rwego rw’ibikorwa remezo, ibi bihugu byagiye bifatanya mu mishinga iteza imbere imihanda n’ubwikorezi, bigafasha koroshya ubucuruzi no guhuza abaturage.
Mu bijyanye n’umutekano, ubufatanye bufasha mu guhangana n’ibibazo by’umutekano muke n’ibyaha byambukiranya imipaka.
Iyi nama ya 12 ya JPC ni ikimenyetso cy’uko ibihugu byombi bikomeje kongera imbaraga mu kubaka umubano ushingiye ku nyungu rusange n’iterambere rirambye.
