Umujyi wa Kigali ukomeje gutera imbere kandi bigaragarira ku nyubako ndende zikunze kuhubakwa.
Muri iki gihe hari kubakwa inzu ndende yiswe Sahara Residence izaba ifite inzu 12 zigerekeranye, ikazaba akandi karusho mu kurimbisha uyu mujyi no kuwushyira ku rundi rwego rw’amajyambere.
Izubakwa na sosiyete yitwa ‘Prime Gate Developers’ ihagarariwe na Eng. Delphin Tuyishime, umuhanga mu by’ubwubatsi wiyemeje guhuriza hamwe urubyiruko bakubaka umuturirwa uzaba uri mu miremire i Kigali.
Iyi nyubako yubatse ku muhanda uri hafi ya Lemigo Hotel, ushobora kuyigeraho mu minota itanu uvuye kuri Stade Amahoro cyangwa nyuma y’iminota 10 uvuye mu Mujyi rwagati.
Tuyishime yafatanyije na Kabandana Augustin na Gerard Mpyisi umenyereye ishoramari, biyemeza kwinjira mu ry’imiturire.
Kuwa Gatanu tariki 25, Mata, 2026 nibwo abo barwiyemezamirimo batangiye kubaka iyo nzu.
Bavuga ko basanze bidakwiye ko abashoramari b’abanyamahanga baba ari bo bagira uruhare runini kurusha Abanyarwanda mu kubaka inzu ndende zizagirira Abanyarwanda akamaro kurenza abo banyamahanga.
Mu gusobanura uko icyo gitekerezo cyaje, Tuyishimire Delphin ati: “Nararebye nsanga abanyamahanga baza hano iwacu bagashora imari hanyuma akaba ari twe dushyira mu bikorwa iyo mishinga yabo, nsanga bifashisha ibitekerezo byacu mu kubibyazamo inyungu.”
Avuga ko nyuma y’uko amaze igihe aba muri Dubai, muri Leta zinyuze z’Abarabu, yaje kumenya ubwenge bwo kubaka inzu nk’izo n’akamaro bigira mu gihe kirambye.
Umugabo ugeze mu zabukuru kandi usanzwe ari rwiyemezamirimo Gérard Mpyisi avuga ko yasanze atatererana urubyiruko rwiyemeje kuzamura inyubako nk’iyo kubera gusobanukirwa n’icyerekerezo cy’igihugu.
Ati “Mbabwije ukuri, baza kumbwira umushinga nabanje kumva bidashoboka. Nabahaye ikizamini cyo kujya gushaka ibyangombwa byo gutangira kubaka, ariko nyuma y’igihe gito mbona barabizanye.”
Avuga ko aho hantu biyemeje kubaka, yari yarahageneye umuryango we ariko aza kuwumenyesha ko aho hantu hagiye gusenywa babanza kutabyumva.
Icyakora, aho aberekeye ibizahakorerwa nibwo batangiye kumwumva none bafite icyizere ko mu myaka ibiri iyo nzu iri mu ndende ziri mu Rwanda izaba yaruzuye.
Prime Gate Developers ni sosiyete ikoramo urubyiruko rurenga 40 ruri munsi y’imyaka 30, harimo abashinzwe gushushanya imbata z’inzu, abashinzwe kuzishakira amasoko, abashinzwe ikoranabuhanga n’ibindi.
Bahagarariwe na Dr. Igabe Egide nk’Umuyobozi Mukuru wa ‘Prime Gate Developers’, akaba umwe mu batangije gahunda y’ingendo rusange mu modoka zifashisha amashanyarazi ubwo yari Umuyobozi Mukuru wa Volcano Express.
Hari icyo Leta ibizeza…
Umuyobozi Mukuru w’Ikigo cy’Igihugu gishinzwe guteza imbere imiturire (Rwanda Housing Authority, RHA), Alphonse Rukaburandekwe avuga ko bazakorana n’iyo sosiyete.
Iyo mikoranire izaba igamije gufasha igihugu kugera ku ntego zacyo za Gahunda ya Kabiri y’Igihugu yo Kwihutisha Iterambere (NST2).
Rukaburandekwe ati: “Ducyeneye abashoramari benshi nka Prime Gate Developers, bubaka inzu nyinshi ziganjemo izo guturamo kuko nibura muri NST2 dusabwa kubaka inzu zirenga ibihumbi 500.”
Ni inzu zizafasha Abanyarwanda kuba ahantu hatekanye kandi huje ubwuzu.
Umushinga wa mbere ‘Prime Gate Developers’ ugiye gushyira mu bikorwa ni inyubako yiswe ‘Sahara Residence’, ikaba ari inzu igeretse inshuro 12, utabariyemo inzu ibanza hasi.
Inzu ibanza hasi n’indi igeretseho bwa mbere zagenewe abifuza gushyiramo aho abantu bafatira amafunguro, ibiro, amaduka n’ibindi by’ubucuruzi.
Iyi nzu izubakwa ku Kimihurura muri metero nke hafi ya Kigali Convention Centre.
Igice cyo hasi cyagenewe ahajya restaurant, nibura imwe muri metero kare 236.
Kuva ku igorofa rya kabiri kugeza ku rya 12 zo ni izo guturamo, zikazabamo ibintu byose nkenerwa yaba uruganiriro rwisanzuye, igikoni cy’imbere mu nzu, icyumba ubwiherero buri kumwe n’ubwogero n’ibindi byose nkenerwa mu nzu igezweho.
Iyo nzu kandi izaba ifite aho abantu bidumbaguza bita ‘piscine’, ikagira aho bagororera umubiri bita ‘gym’, hakaba aho abafite ibinyabiziga cyangwa ababasuye babiparika n’ibindi nk’ibyo.
Inzu ziteganyijwe kuzura muri iyo nyubako zose hamwe ni 111, ariko izizagurishwa ni 101 kandi IGIHE cyemeza ko izigera kuri 70% ‘zamaze kugurwa.’
Izindi 30% zigomba gutangwa bitarenze ukwezi kumwe.
Kugura imari muri iyi nyubako bisaba kwishyura guhera ku $126,000, ariko umuntu ashobora kwishyura kuva kuri 20% kugeza kuri 30%, ahasigaye akajya agenda yishyura 1%.
‘Prime Gate Developers’ igaragaza ko uzashora imari muri iyi nyubako azajya ahabwa inyungu ya 18% y’ayo yatanze ku kigero kiri hagati ya 12% na 18% buri mwaka.
