Ishami ry’Umuryango w’Abibumbye ryita ku biribwa, Programme Alimentaire Mondial, PAM, riratabariza impunzi 130,000 ziba mu Burundi ko niba hatabonetse amafaranga yo kuzishakira no kuziha ibiribwa, zizicwa n’inzara bidatinze.
Ibiribwa iri shami risigaranye mu bubiko bwaryo nk’uko ribivuga, bizarangirana n’Ukwakira(10), 2027.
PAM yanditse mu itangazo yacishije kuri murandasi ko ikeneye byibura Miliyoni $ 35 ngo izabe ifite ibiribwa bihagije byo gusaranganya izo mpunzi ziganjemo abagore n’abana.
Ikindi ni uko niba ayo mafaranga atabonetse vuba aha, ibiribwa bisigaye mu bubiko bwa PAM aho mu Burundi ntibizarenza Ukwakira(10) mu mwaka wa 2026.
Mu rwego rwo kurondereza ibihari, abakozi ba PAM bahisemo kugabanya ingano y’ibyo impunzi zahabwaga kugira ngo iminsi ibe yicuma.
Indyo nke kandi nkene yatumye ubuzima bw’izi mpunzi buzahara, hakiyongeraho n’imibereho isanzwe ari mibi ku bantu baba mu nkambi aho ari ho hose ku isi.
Ubuke bw’inkunga rero buzatuma iyo mibereho izamba, abana, abagore n’abageze mu zabukuru babe ari bo bahakubitikira kurusha abandi.
PAM itangaje ibi mu gihe ishami rya UN ryita ku mpunzi (UNHCR) riherutse gutangaza ko uburyo ryari rifite bwo kwita ku mpunzi hirya no hino ku isi bwagabanutse cyane.
Mu minsi ishize i Burundi habaye igikorwa cyerekana ko ibintu bitifashe neza mu byerekeye impunzi ubwo abazihagarariye UNHCR bazibwiraga ko ibiribwa biri hafi gushira.
Umujinya watumye zadukira imodoka y’abayobozi ba UNHCR ziyimena ibirahure kandi hakomereka abapolisi babiri ariko bidakomeye.
Abapolisi bahisemo kurasa mu kirere mu rwego rwo guturisha abo baturage abandi bariruka kubera ubwoba.
Intambara zimaze iminsi mu Burasirazuba bwa DRC zakururiye benshi akaga karimo urupfu, ubumuga n’ubuhunzi.
Ubwo muri Uvira no mu bindi bice bya DRC hadukaga imirwano ikomeye byatumye abaturage benshi bo muri iki gice bahungiye mu Burundi, bagenda ari abantu 100,000 bahasanga abandi bari bahamaze igihe, bose ubu bakaba ari 130,000.
