Umunyamabanga Nshingwabikorwa wungirije ushinzwe imibereho myiza y’abaturage ba Ngoma Mukayiranga Marie Gloriose yashimye ubuyobozi bwa Croix Rouge y’u Rwanda bwubatse Hoteli RIS Hotel, ishami rya Ngoma.
Ni hoteli nshya, izunganira izindi eshatu zisanzwe muri aka Karere ko mu Burasirazuba bw’u Rwanda gatuwe n’abaturage bakabakaba 500,000.
Visi Meya Mukayiranga ati: “Iyi hoteli ije kongera ubwinshi n’ubwiza bw’ibikorwaremezo bitanga serivisi za hoteli twari dusanganywe. Ibi ni ingenzi mu iterambere ry’Akarere, kuko bifasha mu kwagura amahitamo y’abagana Ngoma no guteza imbere ubucuruzi.”
Mu buzima gatozi buri Karere kagira, harimo n’uburenganzira bwo gushaka no kwemeza abafatanyabikorwa mu ngeri zinyuranye z’imibereho y’abagatuye.
Croix Rouge y’u Rwanda iri mu bafatanya na Ngoma mu kuzamura urwego rw’imibereho y’abaturage binyuze mu kubegereza ibikorwaremezo bitanga akazi, kubaha amafaranga ( abo muri Jabana bahawe Frw 100,000) ngo batangize imishinga mito cyangwa bagahabwa ibikoresho byo kunoza uko bari basanzwe babayeho.
Abatuye muri Ngoma babwiye itangazamakuru ko iyo hari igikorwaremezo kije aho batuye, bibabera uburyo bwo gukora, bakabona ayo kwikenura no guteganyiriza ‘ejo heza’.
Turatsinze Innocent yagize ati: “Twishimira ko Ngoma ikomeje gutera imbere, ikaba yungutse indi hoteli. Bitanga icyizere ko abantu benshi bazajya baza muri aka Karere bakaruhukira, bityo ibikorwa by’ubucuruzi na serivisi bikaguka n’abahinzi bakabona aho bagurisha umusaruro ku giciro cyiza.”
Iyo amahoteli abaye menshi mu gace runaka, biha abakiliya amahitamo y’aho baruhukira badahenzwe.
Alice Niyomufasha avuga ko bifasha mu kugabanya ubushoferi.
Ati: “Twishimiye ko hiyongereye indi hoteli, kuko ari ikimenyetso cy’uko Ngoma ikomeje gutera imbere. Turifuza ko ibikorwa nk’ibi byakomeza kwiyongera, bikazana ubukungu ku baturage ba Ngoma, ikindi nuko iyi hoteli igiye gutanga akazi ku rubyiruko rwo mu Karere kacu.”
Umuyobozi muri Croix Rouge y’u Rwanda ushinzwe itumanaho n’inozamubano Emmanuel Mazimpaka avuga ko inshingano z’uyu muryango zitagarukira k’ukuramira abari mu kaga, ahubwo ziyongeraho no kububakira ubushobozi bwatuma bibeshaho neza.
Mu Karere ka Kayonza naho hatashwe ububiko bw’ibintu by’ibanze byagoboka abantu mu gihe cy’amage bwiswe Kayonza Strategic Stock, bukaba bwarafunguwe ku mugaragaro n’Umunyamabanga Uhoraho muri Minisiteri y’ibikorwa by’Ubutabazi, MINEMA, Ngoga Aristarque.
Yashimangiye ko ubufatanye mu gushyigikira ibikorwa bigamije iterambere n’imibereho myiza y’abaturage ari ngombwa.
Ngoga yashimiye Croix-Rouge y’u Rwanda n’abandi bafatanyabikorwa uruhare bagize mu bikorwa bigamije guteza imbere imibereho myiza y’abaturage cyane cyane mu bijyanye no gukumira ibiza.
Mu bihe n’ahantu hatandukanye, uyu muryango watanze ubufasha bwari bukenewe ngo abagizweho ingaruka n’ibiza bafashwe kuzanzamuka mu rwego rw’ubukungu no kubafasha kudaheranwa n’ihungabana biteza.
Mu gutaha ibikorwa byose bya Croix Rouge, hari n’umuyobozi wayo ku rwego rw’igihugu Appolinaire Karamaga.
Ku byerekeye Akarere ka Ngoma, iriya hoteli ije kunganira iya Saint Joseph Hotel, EastGate Ngoma na Lake Side Recreation Resort Hotel iherereye ku kiyaga cya Mugesera.
RIS Hotel Ngoma yuzuye isanga iya Nyanza, iya Karongi n’iya Kigali ikorera ku cyicaro gikuru cya Croix Rouge y’u Rwanda ku Kacyiru.
RIS( Réseau d’Invéstissement Social) ni impine y’ishami ry’ubucuruzi rya Croix Rouge y’u Rwanda.
Taarifa Rwanda yamenye ko kubaka ububiko bwa Kayonza na Hoteli ya RIS Ngoma byombi bifite agaciro ka miliyoni Frw 400.
