Imibare yatangajwe n’Ikigo cy’igihugu cy’ibarurishamibare, NISR, ku byerekeye uko abantu batega indege mu ngendo zikorerwa imbere mu gihugu yerekana ko mu mwaka wa 2020, abantu 5.922 ari bo bakoreye ingendo imbere mu Rwanda bateze RwandAir, bakaba bariyongereye mu buryo bugaragara kuko mu mwaka wa 2023 babaye 22,547.
Bivuze ko biyongereyeho abantu 16.625, ku ijanisha rya 280%.
Mu gitabo Rwanda Statistical Yearbook cyatangajwe mu mpera za 2024 cyerekana imibare y’uko ubuzima bw’igihugu bwari bwifashe kugeza mu mwaka wa 2023, niho ibi byatangarijwe.
RwandAir ikorera urugendo rumwe imbere mu Rwanda, ruva i Kigali rugana i Kamembe muri Rusizi.
Indege yayo yo mu bwoko bwa Bombardier Q-400 NextGen niyo irukora, rukishyurwa $100 ku Munyarwanda.
Mu mwaka wa 2019, abagenzi bakoreraga ingendo imbere mu gihugu bari 20.959, ariko bigeze mu mwaka wa 2020 baragabanuka bagera kuri 5.922, biza guhinduka mu mwaka wakurikiye kuko biyongereye inshuro zirenga ebyiri bagera ku 11.016.
Bigaragara kandi ko RwandAir yungukiye cyane muri izo ngendo kuko, nk’uko Raporo ya Minisiteri y’Imari n’Igenamigambi [Rwanda Fiscal Risk Statement] 2024/2025 yasohotse muri Mata ibyerekana, amafaranga yinjije mu mwaka wa 2023 yiyongereyeho 80% ugereranyije n’uwabanje.
Mu mwaka wa 2023, RwandAir yinjije Miliyari Frw 620.6, avuye kuri miliyari Frw 341 mu mwaka wa 2022.
Iyo mibare yerekana ko umwaka wa 2020 wahombeye iki kigo kuko abantu batari bemerewe gutega indege bitewe no kubarinda kwanduzanya COVID-19.
Mu mwaka wa 2019 yinjije Miliyari Frw 334 , aza kugabanuka agera kuri Miliyari Frw 300 Frw mu mwaka wa 2020, na Miliyari Frw 271 Frw mu mwaka wa 2021.
Hagati aho, hari Miliyari Frw 192.3 Leta yahaye iki kigo ngo gikomeze gutwaza muri ibyo bihe bitari byoroshye.
Indi raporo yakozwe n’Ikigo cy’Igihugu cy’Iterambere, RDB, mu mwaka wa 2023 igaragaza ko imizigo yatwawe n’indege ya RwandAir muri uwo mwaka yiyongereyeho 22,7%, igera kuri toni 4.595.
Iyo mizigo yoherejwe i Dubai muri Leta ziyunze z’Abarabu, indi ijyanwa mu Bwongereza no mu Bubiligi.
Ikindi ni uko 60% by’abagenzi baca ku kibuga mpuzamahanga cy’indege cya Kigali batega RwandAir.
