Amerika na Iran bakomeje kugabanaho ibitero ku munsi wa munani wikurikiranya, nyuma y’uko igitero Iran yagabye ku birindiro by’ingabo za Amerika biri muri Yorodani cyahitanye abasirikare babiri ba Amerika, mu gihe undi umwe yaburiwe irengero.
Ibinyamakuru byo muri Iran byatangaje ko uruganda rw’ingufu za nikereyari rwari rukiri kubakwa mu mujyi wa Darkhoveyn, mu Majyepfo y’Uburengerazuba bw’igihugu, rwagabweho igitero nijoro.
Byongeye kandi, ikirwa cya Qeshm na cyo cyarashwe.
Muri Koweti, abayobozi batangaje ko uruganda rutanga amashanyarazi n’urutunganya amazi rwongeye kugabwaho igitero ku nshuro ya kabiri mu minsi ibiri ishize.
Nyuma yaho ku Cyumweru, igisirikare cya Yorodani cyatangaje ko cyahanuye misile eshatu zari ziturutse muri Iran, mu gihe indi imwe yaguye mu gace kadatuyemo abaturage.
Ibi byabaye nyuma y’uko Amerika iburiye ko icyambu cya Aqaba muri Yorodani gishobora kugabwaho igitero.
Mu minsi ishize, Amerika na Iran byakajije umurego mu kugabanaho ibitero, buri ruhande rushinja urundi kwibasira ibikorwa remezo by’ingenzi.
Amerika yongeye gushyiraho ihagarikwa ry’ubwikorezi bwo mu byambu bya Iran, mu gihe Iran yatangaje ko Hormuz inyuramo igice kinini cya peteroli yoherezwa ku isi, yafunzwe.
Ibi bibaye nyuma y’uko agahenge kari kamaze kugerwaho hagati y’impande zombi kasenyutse hatarashira ukwezi.
Ku Cyumweru, umutwe w’Ingabo zirinda Impinduramatwara ya Iran (IRGC) watangaje ko ubwato bubiri bwarenze ku mabwiriza ya Iran yo kudaca muri uwo muyoboro, bityo bugahura n’ibyo yise “impanuka”.
Waburiye ko ubundi bwato bwose bushyigikiwe na Amerika cyangwa bukoresha inzira Iran yafunze “nabwo buzahura n’impanuka.”
Igisirikare cya Amerika cyatangaje ko ibitero byacyo byo ku ijoro rya munani byari bigamije kurushaho kugabanya ubushobozi bwa Iran bwo guhungabanya ubucuruzi bwo mu nyanja bukoresha Umuyoboro wa Hormuz, ndetse no guhana byihuse ingabo za IRGC kubera igitero zagabye ku basirikare ba Amerika muri Yorodani.
Amashusho yemejwe yafatiwe imbere muri ibyo birindiro muri Yorodani yagaragaje nibura ahantu habiri misile zaguye ndetse n’iturika rikomeye.
Minisitiri w’Ingabo wa Amerika, Pete Hegseth, yunamiye abasirikare bapfuye agira ati: “Imana ibahe iruhuko ridashira, ntwari zacu. Igitambo batanze kirushaho kudukomeza mu rugamba.”
Umubare w’abasirikare ba Amerika bamaze kugwa muri iyi ntambara ugeze kuri 16, nyuma y’uko umupilote w’indege y’intambara wo mu ngabo zirwanira mu mazi wari umaze iminsi yaraburiwe irengero na we atangajwe ko yapfuye.
Muri Iran, Minisiteri y’Ubuzima ivuga ko mu byumweru bitatu bishize abantu nibura 50 bamaze kwicwa, mu gihe abarenga 500 bakomerekeye mu bitero bya Amerika.
Ku wa Gatandatu, Inama y’Ubufatanye bw’Ibihugu byo mu Kigobe (Gulf Cooperation Council – GCC), ihuza Bahrain, Koweti, Oman, Qatar, Arabiya Sawudite n’Ubumwe bw’Ibihugu by’Abarabu (UAE), yashinje Iran kwibasira ibikorwa remezo by’abasivili nyuma y’uko uruganda rw’amashanyarazi n’urutunganya amazi muri Koweti rugabweho igitero cya mbere.
Ku Cyumweru, Koweti yatangaje ko urwo ruganda rwongeye kugabwaho igitero ku nshuro ya kabiri mu minsi ibiri, bikaba byateje inkongi y’umuriro.
Iran nayo yatangaje ko ku wa Gatandatu yagabye ibitero ku birindiro by’indege za gisirikare ndetse n’ububiko bw’ibikoresho bya gisirikare byakoreshwaga n’ingabo za Amerika muri Koweti.
Ku rundi ruhande, Amerika yavuze ko yo yibasiye gusa ibikorwa bya gisirikare, birimo ububiko n’imihanda ikoreshwa mu gutwara ibikoresho bya gisirikare, nyuma y’uko Iran ishinje Amerika kurasa ibiraro n’aho gari ya moshi zihagarara.
Mu mategeko mpuzamahanga agenga intambara, kugaba ibitero ku basivili cyangwa ku bikorwa remezo by’abasivili birabujijwe.
Icyakora, ibikorwa remezo nk’ibiraro cyangwa inganda z’amashanyarazi bishobora gutakaza uburinzi bwabyo iyo bikoreshwa mu gushyigikira ibikorwa bya gisirikare by’umwanzi.
Muri Kamena, Amerika na Iran zari zageze ku masezerano y’agateganyo yo guhagarika intambara.
Ariko ayo masezerano yahise asenyuka nyuma y’ibyumweru bike, maze Perezida Donald Trump atangaza ku wa 8 Nyakanga ko ayo masezerano “yarangiye burundu.”
Mu butumwa bwanditse yasohoye ku wa Gatandatu nijoro, Umuyobozi w’Ikirenga wa Iran, Mojtaba Khamenei, yavuze ko Amerika yakomeje kurenga ku masezerano inshuro nyinshi, ibintu yavuze ko byerekanye ukuri kudashidikanywaho ko umukono wa Perezida wa Amerika utakigira agaciro kandi utakiri uwo kwizerwa.
