BioNTech Yatanze Ikoranabuhanga Rizakoreshwa Mu Nkingo Za COVID-19 Mu Rwanda

Minisitiri w’Ubuzima Dr Ngamije Daniel yatangaje ko mu minsi mike inkingo za Covid-19 zizatangira gukorerwa mu Rwanda, nyuma y’uko ikigo BioNTech cyemeye gutanga ikoranabuhanga rizifashishwa.

Ni nyuma y’inama Perezida Paul Kagame yagiranye n’ibigo bitandukanye, mu ruzinduko arimo mu Budage.

BioNTech yo mu Budage ni yo yatanze ikoranabuhanga rya mRNA rikoreshwa mu gukora inkingo zimenyerewe nka Pfizer.

- Advertisement -

Perezida Kagame ari mu Budage aho yitabiriye inama izwi nka G-20 Compact with Africa, igamije kongera ishoramari muri Afurika, mu nzego z’abikorera.

Mu ishoramari ryashyizwe mu biganirwaho muri iriya nama harimo n’irijyanye no gukorera inkingo za Covid-19 muri Afurika, mu nganda zirimo kubakwa mu Rwanda, Sénégal na Afurika y’Epfo.

Minisitiri Ngamije yatangaje ko BioNTech yemeye gutanga ikoranabuhanga ku nkingo zizakorerwa mu Rwanda na Sénégal, ku buryo mu gihe kiri imbere imishinga izatangira.

Mu Budage, Perezida Kagame yanagiranye ibiganiro na mugenzi we wa Senegal, Macky Sall.

Yaganiriye kandi n’abaterankunga n’uwo mushinga barimo Sabine Dall’Omo uyobora Siemens South Africa, Werner Hoyer uyobora European Investment Bank na Holm Heller uyobora kENUP Foundation.

U Rwanda rumaze iminsi rwubaka ubushobozi bwo gukorera inkingo za Covid-19 mu gihugu, kimwe n’ibindi bikoresho nkenerwa byo kwa muganga.

Ni urugendo rwahereye ku kuzamura ubushobozi bw’Ikigo gishinzwe kugenzura ibiribwa n’imiti mu Rwanda, Rwanda FDA, igikorwa cyitezweho guha icyizere abashoramari muri uru rwego.

Ni gahunda yitezweho kugabanya uburyo Afurika yiringira amahanga ku nkingo ikenera ziva hanze hejuru ya 99%.

Bizatuma haboneka inkingo nyinshi zikorerwa muri Afurika kandi zigenewe Abanyafurika, muri iki gihe bakeneye gukingirwa Covid-19 ariko kubona inkingo ntibyoroshye.

Bibarwa ko Abanyafurika bakingiwe magingo aya batararenga 2%.